भांगरभूंय | प्रतिनिधी
उत्तरकाशी, खबरां संस्था: उत्तरकाशीच्या सिल्कियारा बोगद्यांत आडकून उरिल्ल्या ४१ कामगारांक १७ दिसांनी सोडयले. देशांतल्यो विवीध वेवस्था हे आव्हानात्मक मोहिमेंत वावुरताल्यात. तशेंच जायत्या आंतरराश्ट्रीय संघटणांनीय आपले यत्न केल्ले. आतां ह्या बोगद्यांतल्यान सुरक्षीत भायर आयिल्ले कामगार आपलो अणभव सांगतात. सुबोध कुमार वर्मा ह्या कामारान ते १७ दीस कशे आशिल्ले? हाचो अणभव सांगलो.
‘हांव सुबोध कुमार वर्मा, हांव झारखंडाचो. हांव १७ दीस उत्तरकाशी बोगद्यांत म्हज्या सहकार्यां वांगडा अडकल्लों. पयलीं २४ वरां आमचे सगळ्यांक खातीर खूब कठीण आशिल्लीं. आमकां खावपाक लेगीत कांयच मेळूंक ना. मात ताचे उपरांत आमची कंपनी काजू, बदाम, किशमीश, पुडींग जें कितें शक्य आसलें तें नळयेंतल्यान आमचे खातीर खावपाक धाडटाले. धा दिसांनी आमकां वरण- भात, चपाती, भाजी, जेवणूय मेळ्ळें. कंपनी विशीं म्हाका कसलीच कागाळ ना. हांव बरो वेवस्थीत आसां. पयलीं २४ वरां मात खूब भिरांकूळ आशिल्लीं. भितर कितें जातलें हाची आमकां कल्पना नाशिल्ली. पूण आतां सगळ्यांच्या मागण्यांक लागून हांव आनी म्हजे सगळे सहकारी भायर आयल्यात, अशें सुबोध कुमार वर्मा हांणी सांगलें.
मजूर विश्वजीत कुमार वर्मा हांणी बोगद्यांतल्यान भायर सरले उपरांत आपली प्रतिक्रिया उक्तायतना म्हणलें, बोगदो कोसळ्ळ्या उपरांत भायर सरपाचे सगळे मार्ग बंद आसात अशें म्हाका दिसलें. पूण, आमकां भायर काडपा खातीर सगळे यत्न कंपनीन केल्ले. ऑक्सिजन आनी जेवण-खाणाची वेवस्था केल्ली. परदेशांतल्यान यंत्रणांय मागयल्लीं.
बोगदो कोसळ्ळ्या उपरांत १० ते १५ वरां मात्शी अडचणी आयल्यो. पूण उदकाच्या नळयेंतल्यान आमकां जेवण मेळटालें. ते उपरांत जेवण, काजू, बदाम आमकां दुसरे नळयेंतल्यान दिलें. तशेंच बोगद्यांत आडकून आसतना आमी कुटुंबा कडेन उलयताले अशें विश्वजीत कुमार वर्मा हांणी सांगलें.
झारखंडाच्या खुंटी जिल्ह्यांत रावपी ३२ वर्सां पिरायेच्या चमरा उरांव हांणी आपलो १७ दिसांचो अणभव सांगले. तांणी सांगलें, पयले कांय दीस खूब कठीण आनी ताण आशिल्लो. पूण उपरांत भायल्या रेस्क्यू पंगडा कडेन संपर्क सादलो तेन्ना आमी भायर सरतले असो आत्मविस्वास आमकां आयलो. पयलेच खेपे आमकां जेवण आयलें तेन्ना देवूच आमचे खातीर धांवून आयला, अशें दिसलें. आमचो ताण उणो करपा खातीर रेस्क्यू पंगडान आमकां मोबायल आनी बोर्ड गेम दिले. ते उपरांत आमी सगळे कामगार मोबायलाचेर लुडो खेळटाले.
बोगद्यांत आडकून पडपी कामगारांक ताणमुक्त दवरपाचे आनी तांकां जिवाची खात्री दिवपाचे प्रशासनान जायते यत्न केले. वेळ पासार करपा खातीर आनी तांकां गुंतून दवरपा खातीर लुडो, इस्पिको, बुद्दीबळ सारकिल्ले खेळ बोगद्यांत धाडटाले. मजुरांक ताण मुक्त दवरपा खातीर योग करपाचो सल्लो दिल्लो. तशेंच सरकारान मोबायल फोन धाडले, जाका लागून ते आपल्या कुटुंबा कडेन संपर्क सादपाक शकताले. शेनवारा २६ नोव्हेंबराक कामगारांक खेळ खेळपाक मोबायल फोनूय दिले.
मरण हारलें आनी जिद्द जिखली
आमी मदीं ताजे हवेचोय अणभव घेतलो. बोगद्यांत रिगपी उदका सकयल बसून आमी न्हाताले. आमी देवाचेर विस्वास दवरलो, ताका लागून आमकां बळ मेळ्ळें आनी निमाणी आमकां सुटका मेळ्ळी. निमाणे कामगार चमरा उरांव हांणी सगळे कामगारांक, प्रार्थना करपी पुराय देशांतल्या लोकांचे, वाटावप्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
