भांगरभूंय | प्रतिनिधी
म्हापशें, प्रतिनिधी ः दिल्लीचे मुख्यमंत्री तशेंच आम आदमी पार्टीचे सर्वेसर्वा अरविंद केजरीवाल हांणी निवडणूक आदर्श आचारसंहितेचो भंग केल्ल्या प्रकरणांत म्हापशें न्यायालयान समन्स जारी करून २९ नोव्हेंबर म्हळ्यार फाल्यां न्यायालयांत हाजीर रावपाचो आदेश दिला.
हो समन्स म्हापशें प्रथम वर्ग न्यायालयाची न्या. शिल्पा पंडीत हांणी जारी केल्ल्यान फाल्यां सकाळीं न्यायालयांत हाजीर रावपाचो आदेश केजरीवाल हांकां दिला.
२०१७ च्या विधानसभा वेंचणुके वेळार म्हापश्यां टॅक्सी स्टॅण्डाचेर आयोजीत पक्षाचे प्रचार बसकेंत केजरीवाल हांणी हेर पक्षां कडल्यान पयशे घेयात. पूण मत फकत आम आदमीक दियात असो उलो मारिल्लो. ह्या प्रकरणांत तेन्नाचे निर्वाचन अधिकारी गुरूदास गांवस हांणी केजरीवाल हांचे आड सुधारीत निवडणूक आचारसंहितेचो भंग केल्ल्याची कागाळ न्यायालयात दाखल केल्ली.
फाटल्या ८ जानेवारी २०१७ दिसा सांजेवेळार ही म्हापसा टॅक्सी स्थानकाचेर जाहीर बसका आयोजित केल्ली.हे बसकेक केजरीवाल हांच्या उल्याक भारतीय जनता पार्टीने आक्षेप घेवन वेंचूक आयोगा कडेन कागाळ केल्ली. हे कागाळीच्या आदारार आयोगान केजरीवाल हाकां समन्स धाडला.
आम आदमी पार्टीचे प्रचार बसके वेळार उलयतना पक्षाचे मुखेल फुडारी अरविंद केजरीवाल हांणी हेर पक्ष आनी उमेदवारां कडल्यान पयशे घेयात, मात मतां आम आदमी पार्टीच्या उमेदवाराकूच दियात असो उलो मारिल्ल्याचें निदर्शनांत आयिल्लें. तांणी अशें वक्तव्य केल्ल्यान लोक प्रतिनिधी कायदो कलम १२३ (१) तशेंच आदर्श आचारसंहिता भंग केल्ल्याच्या भारतीय दंड संहितेचो कायदो कलम १७१ (ब) व १७१ (ई) मोडिल्ल्याचें वेंचणूक अधिकारी गुरूदास देसाय हांणी नमून केल्लें. ते प्रमाण आदर्श निवडणूक आचारसंहितेचो भंग केल्ल्याच्या आरोपाखाला म्हापशें पुलिसांनी केजरीवाल हांचे आड अदखलपात्र गुन्यांव दाखल केल्लो.
हे विशीं म्हापशें पुलिसांनी जुलय २०१८ वर्सा अंतरिम अहवाल न्यायालयांत सादर केल्लो. तेन्नाच्यान न्यायालयांत हो खटलो सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
