भांगरभूंय | प्रतिनिधी
मडगांव, प्रतिनिधी : नावेली कामाचे सुवातेर रावपी कामगारांचो एके सादे, शुल्लक गजाली वयल्यान वाद जालो. ह्या वेळार दुबावीत परशुराम नायक (२९, रा. रातवाडो, मूळ कर्नाटक) हांणी अरविंद ऊर्फ बुल्कान कुजूर (रा. रातवाडो, मूळ छत्तीसगड) हांचेर चाकवान वार केलो. परशुरामाक मडगांव पुलिसांनी अटक केल्या.
मेळिल्ले म्हायती प्रमाण, कागाळदार बंदी कुजूर आनी परशुराम हे दोगूय एकेच कुडींत रावताले. बारीक कारणा वयल्यान त्या दोगांय मदीं झगडें पेटलें. मजगतीं, परशुराम हांणी अरविंदाक बुरश्यो गाळी संवल्यो. रागान परशुरामान अरविंदाचेर चाकवान हल्लो केलो. तातूंत अरविंदाक पोटाक घावो जावन रगत व्हांवपाक लागलें. हे विशीं मडगाव पुलिसांक म्हायती मेळटाच ते घडणुके सुवातेर दाखल जाले. पंचनामो करून जखमी अरविंदाक तांणी उपचारा खातीर हॉस्पिटलांत दाखल केलो.
चवकशे उपरांत दुबावीत परशुराम हाका मडगांव पुलिसांनी अटक केली. ताका न्यायालयांत हाजीर करतले. हे विशीं मडगांव पुलीस निरीक्षक तुळशीदास नायक हांच्या मार्गदर्शना खाला उपनिरीक्षक दामोदर शिरोडकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
