भांगरभूंय | प्रतिनिधी
हरमल, बातमीदार: हरमलच्या मदलोवाडो, कोरकण वाठारांत पेट्रोल पंपाच्या पडींग वाठारांत सुकें पडिल्ल्या तणाक उजो लागलो. कोणाक कांय लुकसाण जावंक ना. अश्यो घडणुको हांगा घडूंक लागिल्ल्यान नागरिकांनी तिडक उक्तायल्या.
काल सकाळीं सुमार १० वरांचेर पेट्रोल पंपा लागसारा सुकत घातिल्ल्या तणाक उजो लागलो. वार्यान हो उजो पातळून तो मसंडभूंय मेरेन पावलो. काजू बागायती मेरेन पावचे पयलीं हो पालयिल्ल्यान व्हड लुकसाण जावपा पसून वाटवलें. हरमलचे पंच सुशांत गावडे हांणी उजो पालोवपी दळाक हे विशीं म्हायती दितांच ते घडणुके सुवातेर पावले.
उजो पालोवपी गाडयेची मागणी
ह्या वाठारांतल्या काजू बागायती, दर्यादेगे वयले हट्स, शॅक्सांक चार- पांच वर्सां पयलीं उजो लागून लाखांनी रुपयांचें लुकसाण जाल्लें. काजू बागायती पेटून गोबोर जावपाच्यो घडणुको दर वर्सा घडटात. उज्याचे घडणुकेची म्हायती पेडणें उजो पालोवपी दळाक दितात. पूण थंयच्यान पावपाक पाऊण वर लागता. बंब हेर कडेन गेल्लो आसल्यार आनीक उशीर जाता. ताका लागून ह्या वाठारांतल्या वेवसायिकांनी स्वतंत्र अग्निशमन दळाची मागणी केल्ली. मांद्रें मतदारसंघा खातीर तरी स्वतंत्र उजो पालोवपी गाडी दिवची, अशी मागणी पंच सुशांत गावडे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
