भांगरभूंय | प्रतिनिधी
नेमान तळ्याची पळोवणी करपाची पंचायतीची मागणी
पणजी : काय समाजविद्वाट्यांच्या कारवायांक लागून सांताक्रुजच्या बोंडवळ तळ्याचें उदक व्हावन तळें सुकून गेलां. हाका लागून तळ्याच्या उदकाचेर निंबून आशिल्ली वायंगण शेती धोक्यात आयल्या. गिमात शेतीक उदक मेळप कठीण आसा, अशी म्हायती शेतकारांनी दिली. सांताक्रुज सरपंच जेनिफर ओलिवेरा आनी पंचांनी तळ्याची पळोवणी करून दोशींचेर कारवाय करपाची मागणी केल्या.
फुडाराक अश्यो घडणुको जावपाक जायना, म्हणून स्लुईस गेटी कडेन (मानस) सीसीटीव्ही कॅमेरे बसोवपा सयत तळ्याची उदका पुरवण खात्यान नेमान पळोवणी करची अशी मागणी पंचायतीन केल्या.
दोन दिसां पयलीं सांताक्रुजचे बोंडवळ तळें सुकिल्ल्याची गजाल उक्ताडार आयली. स्लुईस गेट (मानस) वाल्व काडून साठयल्लें उदक सोडिल्ल्यान उदक व्हावून गेलें. उदक सोडपी मनशांचेर कारवाय करपाची मागणी पंचायत तशेंच शेतकारांनी केल्या. ह्या तळ्याच्या उदकाचेर वायंगण शेती निंबून आसा. आतां फुडाराक जावपी वायंगण शेतीक उदक खंयच्यान हाडपाचें, असो प्रस्न शेतकारांनी केला. शेतांक उदक मेळचें नाच. तशेंच लागच्या बायांचें उदकूय आटपाचो धोको आसा. थळावे आमदार रूडाल्फ फर्नांडिस हांणी सोमारा पळोवणी केले उपरांत पंचायत मंडळान मंगळारा पळोवणी केली.
बोंडवळ तळ्याच्या प्रस्नाचेर चर्चा करपा खातीर पंचायत मंडळाची 5 डिसेंबराक बसका जातली. तळ्या कुशीक सीसीटीव्ही कॅमेरे बसोवपा सयत उदका पुरवण खात्यान नेमान पळोवणी करपाची मागणी पंचायत मंडळान केल्या. पोरणे गोंय पुलिसांक पत्र बरोवन दोशींचेर कारवाय करपाची मागणी पंचायत करतली, अशें सरपंच जेनिफर ओलिवेरा हांणी पळोवणी उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
