भांगरभूंय | प्रतिनिधी
हळदोणेंचे आमदार फेरेरा हांची मागणी
भांगरभूंय । खबरां मेज
पणजीः एका विशिश्ट धर्मा आड वादग्रस्त विधानां करपी आनी धर्मीक सुसंवाद इबाडपी लोकां आड एफआयआर नोंद करपाची मागणी काँग्रेसीचे आमदार कार्लोस आल्वारीस फेरेरा हांणी केल्या.
भाजपाची राष्ट्रीय प्रवक्ते नुपूर शर्मा आनी दिल्ली भाजपा आयटी विभाग मुखेल नवीन जिंदल शर्मा हांणी केल्ल्या वादग्रस्त विधानांचे फाटभुंयेर फेरेरान ही मागणी केल्या. नुपूराक पक्षांतल्यान काडून उडयलां आनी जिंदलाक निलंबीत केला.
‘भारतीय संविधानाच्या आदाराचेर भाजपा सगल्या धर्मांक मान दिता हें सिद्ध करचें पडटलें. कतारांतल्या भारतीय दूतावासानय केंद्राक एफआयआर नोंद करपाक सांगलां. भाजपाच्या फुडाऱ्यांनी केल्ल्या विधानांचो फकत देशांतच न्हय तर आंतरराष्ट्रीय पांवड्यार परिणाम जाता अशें फेरेरा हांणी सांगलें. अजापाची गजाल म्हळ्यार ह्या वादग्रस्त विधानाक लागून परदेशांतल्यान खर प्रतिक्रिया येत आसतना केंद्र सरकारान ओगी रावप पसंत केलां. भाजपा मात प्रतिक्रिया दित सुटला, अशें फेरेरा हांणी सांगलें.
कांय राजकी फुडारी नेमान विधानां करून देशांतलें वातावरण खोदूळ करपाक लागल्यात. उपाय काडना म्हणून सरकारा वयलो अविश्वास वाडत आसा. लोकांनी विधानां केले उपरांत कसलीच कारवाय जायना जाल्यार तांकां सरकाराचो तेंको आसा वा सरकाराच्या सुचोवण्यां प्रमाण ते वागतात अशें दिसता. हाका लागून समाजांत तेढ निर्माण जावपाक लागल्या. हें बेगोबेग बंद जावंक जाय. हे लोक राष्ट्रविरोधी आसात. ताचेर गुन्यांव दाखल करून तांकां अटक करची, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
