भांगरभूंय | प्रतिनिधी
पणजीः बायल आनी भुरगीं उदरगत खात्यान इंटर्नशीप येवजणे खाला अर्ज मागयल्यात. वेंचून काडिल्ल्या उमेदवारांक राज्यांतल्या अपना घर, बायलां खातरीचें संरक्षण गृह, भुरगें कल्याण समित्यो, बाल न्याय मंडळां आनी पिडेस्त सहाय्य कक्ष हांगा काम करपाची संद मेळटली, अशी कळोवणी बायल आनी भुरगीं उदरगत खात्यान जारी केल्या.
खात्यान समुपदेशन, मानसशास्त्र, समाजकार्य, गृहविज्ञान सारक्या फाट्यांतल्या विद्यार्थ्यां खातीर इंटर्नशीप येवजण अधिसुचीत केल्या. हे येवजणे खातीर गरजेची पात्रताय म्हण उमेदवार खंयच्याय मान्यताप्राप्त विद्यापिठांतल्यान समाज सेवा, समाजीक कार्य, समाजशास्त्र, मानसशास्त्र, गृहविज्ञान हातूंत पदव्युत्तर पद्वी वा समुपदेशनांत पदव्युत्तर पदविका आदीं पास जाल्लो आसपाक जाय. उमेदवारान इंटर्नशीप खातीर अर्ज करचे पयलीं, चडांतचड तीन वर्सांभितर आपली पदव्युत्तर पद्वी पुराय केल्ली आसची. उमेदवारान निमाण्या वर्सांत वट्ट चडांत चड ५०% गुण मेळिल्ले आसपाक जाय.
खातें १५,०००/- रुपया दर म्हयन्याक अशा थारावीक इंटर्नशीप भत्त्याचेर, फकत एका वर्साच्या काळा खातीर इंटर्न समुपदेशक हीं पदां भरतले. इत्सूक आनी पात्र उमेदवारांनी विहीत नमुन्यांतल्या अर्जांची हार्ड कॉपी गरजेच्या कागदपत्रां सयत पणजे बायलां आनी भुरगीं उदरगत संचालनालयाचे कचेरेंत २५ जुन ते २४ जुलय मजगतीं सांजेच्या ५.३० वरां मेरेन दाखल करची, अशी सुचोवणी खात्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
