भांगरभूंय | प्रतिनिधी
म्हापशें, प्रतिनिधी ः म्हापशें शारांच्या भौशीक सुवातींनी दर दिसा दोन वरां अतिक्रमण विरोधी मोहीम घेवपाचे निर्देश पालिका मुखेल अधिकाऱ्यांनी नगरपालिका निरिक्षकांक दिल्यात. हाका लागून सुमार स म्हयन्यांच्या काळा उपरांत अतिक्रमण काडून उडोवपाची मोहीम परतून सुरू जातली.
मुखेल अधिकारी चंद्रकांत शेटकार हांणी पालिका निरिक्षकांक तांच्या अधिकृत कार्यकाळांत दोन वरां भौशीक सुवातेर अतिक्रमण काडून उडोवपाची मोहीम चलोवपाचो आदेश जारी करून दिला.
ह्या आदेशा प्रमाण पालिका निरिक्षक शेखर गांवास हांकां वॉर्ड 1 ते 7, प्रज्वल धारगळकार हांका वॉर्ड 8 ते 14 आनी नरसिंह राटवळ हांका पालिका बाजारा सयत वॉर्ड 15 ते 20 हांचे अतिक्रमणाचेर कारवाय करपाची जापसालदारकी दिल्या. सामान जप्त करतना योग्य प्रक्रियेक पाळो दिवन आनी जप्त केल्ल्या वस्तूंची योग्य वळेरी सयत पंचनामो करपाचोय निर्देश मुखेल अधिकाऱ्यांनी दिला. तशेंच ही कारवाय करतना मोलादीक वस्तूंचें लुकसाण वा वस्तू नश्ट जावचें न्हय हाची जतनाय घेवपाची सल्लो दिलां. तशेंच ह्या आदेशाचें खर पालन करून जप्त केल्ल्या वस्तूंचो अनुपालन अहवाल पंदरा दिसां भितर सादर करपाचो निर्देश दिला.
वांटून घेतिल्ल्या वॉर्डांनी कसलोय अतिक्रमण वा बेकायदेशीर वेवसाय मेळ्ळो जाल्यार संबंदीत पालिका निरिक्षकांक जापसालदार धरतले आनी योग्य दिसल्यार गरजेची कारवाय करतलें अशी शिटकावणी तांणी दिल्या.
म्हापशांतल्या अतिक्रमणां आड कारवाय करपाचो आदेश मुखेल अधिकाऱ्यांनी पालिका निरिक्षकांक दिला. पूण हे निरिक्षक जोडयेक कर्मचारी आनी सामान व्हरपाक तांणी वाहन दिवंक ना. देखून हो आदेश सध्या तसोच आसा. कर्मचारी आनी वाहनां नासतना पालिका निरिक्षकांक अतिक्रमण काडून उडोवपाचीं कामां करप आनी आदेश पाळप शक्य ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
