भांगरभूंय | प्रतिनिधी
चवगांचेर गुन्यांव नोंद
म्हापशें, प्रतिनिधी ः आझोशी, इल्हास हांगा 36 वर्सा पिरायेचे एके बायलेचो फाटलाव करुन आनी घरांत घुसून तिची छेड काडून मारपेट केल्ल्याच्या आरोपा वयल्यान साईश बोरकार (28) हाचे सयत आनीक तिगांच्या आड आगशी पुलिशेंत गुन्यांव नोंद केलां. दुबावित साईश हो आमदार विरेश बोरकार हांचो भाव.
ही घडणूक 12 नोव्हेंबराक सांजवेळा सुमार 7.45 वरांचे घडली. ह्या प्रकरणां आड पुलिसांनी 21 नोव्हेंबराक गुन्यांव नोंद केलो.
दुबावीत साईश बोरकारान नेवरा – तिसवाडे कागाळदार आनी तिचे इश्टणीक आडायलें आनी मारपेट केली. तशेंच तांकां जिवें मारपाची धमकीय दिली. उपरांत दुबावितान आपले वांगडा अजून तिगांक घेवन त्या कागाळदार बायलेचो फाटलाव केलो. इतलेंच न्हय तर आझोसी- इल्हासच्या त्या बायलेच्या घरांत बेकायदेशीर रितीन भितर सरून मुखेल दाराची तोडफोड केली.
ह्या प्रकरणांत ते बायलेन केल्ल्या कागाळीचेर आगशी पुलिसांनी भा. दं. सं. च्या कलम 504, 323, 506 (2), 447, 354 ड आनी 34 खाला गुन्यांव नोंद केलो. पुलीस निरिक्षक विक्रम नायक हांच्या फुडारपणा खाला उपनिरिक्षक रमेश हरिजन फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
