भांगरभूंय | प्रतिनिधी
वास्कोः आपली आवय जयादेवी चौहाण आनी लग्न जाल्ली भयण शिवानी अनुराग राजावत (२६) हांकां गॅस सिलिंडर स्फोटान अपघाती मरण येवंक ना. तो घातपात आशिल्ल्याचो आरोप भाव शुभम चौहाण हांणी काल केल्लो. हे विशीं सीबीआय वतीन चवकशी जावपीच गरज तांणीं उक्तायल्ली. जाल्यार आयज शिवानी हिचे बापूय दिलीप सिंग चौहान हांणी ही घडणूक दुर्घटना न्हय. हो घातपाताचो प्रकार अशें पत्र गोंयचे मुख्यमंत्री डॉ. प्रमोद सावंत हांकां बरयलां.
तांणी पत्रांत म्हणलां, तिच्या घोवा गेले लोक तिचो हुंड्या खातीर छळ करताले. तशेंच तिच्या घोवाचे हेर बायले कडेन संबंद आशिल्ल्याचो दुबाव तांणी पत्रांत उक्तायला.
शिवानीक लग्नाक सात वर्सा पुराय जावचे पयलीं मरण आयिल्ल्यान ह्या प्रकरणाची मुरगांवचो उपजिल्होधिकारी भगवंत करमली चवकशी करतात. तांकां शुभम हाणें काल निवेदन भेटयल्ले.
वास्को पुलिसांनी मुळावे चवकशेक सुरवात केल्या. मात उपजिल्होधिकारी कार्यालया कडल्यान अहवाल मेळटगीर चवकशेक नेट येवपाची शक्यताय आसा. मजगतीं जयादेवी हिचे कुडीचेर मध्यप्रदेशांत निमणे संस्कार जाले. शिवानीची कूड अजून मड्या कुडींत आसा. अनुराग हो बायल शिवानी सयत नवें वाडें हांगां भाड्याच्या फ्लॅटांत रावतालो. २०२२ वर्सा फेब्रुवारी म्हन्यांत ताचें शिवानी कडेन लग्न जाल्लें. शिवानी गुरवार आशिल्ल्यान ताची आवय जयादेवी ताका कुळारा व्हरपाक आयिल्ली. १८ नोव्हेंबराक ती सगलीं मध्यप्रदेशाक वचपाचीं आशिल्लीं. अनुराग भारतीय नौदलांतआसा आनी मध्यप्रदेशांत वचपाक ताणे रजा घेतिल्ली. मात १८ नोव्हेंबराक सकाळी पावणे णव्याच्या सुमाराक गॅस सिलिंडराचो स्फोट जावन शिवानी आनी जयादेवी मरण आयलें.
दुबाव घेवपी शुभम मध्यप्रदेश पुलीस खात्यांत कामाक आसा. शिवानी आनी जयादेवीक जे तरेन मरण आयलां ते विशीं ताणें जायते प्रस्न उपस्थीत केल्यात. शिवानी आनी जयादेवीच्या मरणा उपरांत पुलिसांनी फॉरेन्सीक पथकाक आपोवपाची गरज आशिल्ली. पूण तशें करनास्तना पंचनामो करून कुडी पोस्ट मॉर्टेमा खातीर व्हेले तशेंच फ्लॅटाचे दार उक्ते रावल्ल्यान थंय लोकांनी यो- वच केल्ल्यान थंयचे पुरावे ना जाले. आपणे कागाळ केल्या उपरांन फोरेन्सीक पंगड थंय आयलो पूण तो मेरेन बरेच पुरावे ना जाल्ल्याचो दावो शुभमान आपले कागाळेंत केला.
रांदपा कुडींतलो गॅस सिलिंडर आनी रेग्युलेटराक कांयच जाले ना. ताका लागून सिलिंडराचो स्फोट जालो ही खबर सत न्हय. स्फोट जाल्लो जाल्यार ताचो आवाज लागींच्या वाठारांत येताशिल्लो. कुडीचें लुकसाण जाताशिल्लें. पूण तशें कांयच जालें ना. ह्या प्रकरणाची खोलायेन चवकशी करपाची मागणी ताणे केल्या. सिलिंडराचो स्फोट जालो ना. शेगडीचें बटन चालू दवोरल्ल्यान गॅस कुडींत पातळ्ळो. शिवानी ना जाल्यार जयादेवीन शेगडी पेटोवपा खातीर बँटन चालू केल्ल्यान वा दिवो पेटोवपा खातीर बटन दाबल्ल्यान गॅसाचो भडको उडून दोगांय गॅसाच्या उज्यांत लासलीं. ओट्यार गॅस लायटर, दुदाची पिशवी आनी हेर वस्तू जाग्यार आशिल्ल्यो. जर लायटरान स्टोव्ह पेटोवपाचो यत्न जाल्लो जाल्यार लागल्ल्या उज्यांत संबंदिताच्या हातांतल्यान लायटर सकल वा पयस पडटलें आसतालें. तशें कांय जाल्लें दिसना. जयादेवी दुदाची पिशवी हाडपाक सकल गेल्ली आनी शिवानी न्हांवपाक गेल्लें. मजगतीं गॅस कुडींत एकठांय जाल्लो. मागीर त्या शेगडेचें बटन कोणे चालू दवरले हो प्रस्न आसा. घडणुकेच्या वेळार आपूण फ्लॅटांत नाशिल्लों. फळां हाडपाक बाजारांत गेल्लों अशें अनुरागाचें म्हणणे आसा. शेगडीचें बटन जर कोणेय चालू दवोरल्लें जाल्यार गॅसाचो भडको उडतगीर तें कोणे बंद केलें. जर कोणे बंद केलें ना जाल्यार भडको उडटगीर गॅस भायर येवप चालून आशिल्लें काय तें आपोआप बंद जालें. ह्या सिलिंडरांत कितलो गॅस बाकी आशिल्लो हे सारके जायत प्रश्न शुभम हांणे उपस्थीत केल्यात.
पुलीस सूत्रां प्रमाण, गॅस शेगडीचें बटन चालू रावल्ल्यान गॅस रांदचे कुडींत पातळ्ळो. कोणे तरी बल्ब पेटोवपा खातीर बटन दाबलें वा गॅस पेटोवपाक लायटराचो वपार केला आसुये ताका लागून भडको उडलो. सिलिंडराचो स्फोट जालो ना. शेंगडेंतल्यान गॅस कसो भायर आयलो हे विशीं चवकशी सुरू आसा. चवकशे उपरांत सत परिस्थिती सामकार येतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
