भांगरभूंय | प्रतिनिधी
मडगांव, प्रतिनिधी : वीज घोटाळो प्रकरणांत शुक्रारा हाजीर रावपा खातीर समन्स जारी केल्ल्या मदल्या तिगांचो पत्तो ना. एकल्याक मरण, एकलो दुयेंत आनी एकलो महाराष्ट्रांत आशिल्ल्यान हे सुनावणेक हाजीर रावचे ना अशें सांगलें.
हे संबंदी तिगांकूय नवो समन्स जारी करीत १५ डिसेंबराक हाजीर रावपाक सांगलां. सांगिल्ल्या वीज घोटाळो प्रकरणांत दक्षीण गोंय जिल्हो विशेश न्यायालयांत बुधवारा सुनावणी जाली.
ह्या प्रकरणांत मंत्री मॉवीन गुदिन्हो हांकां हाजीर ना रावपाची सूट मेळ्ळ्या. ताका लागून शुक्रारी जाल्ले सुनावणेक ते हाजीर नाशिल्ले आनी हेर दुबावीतूय हाजीर रावूंक ना. आदीं २२ नोव्हेंबराक सुनावणेक हाजीर रावपा खातीर समन्स जारी केल्ल्या मदल्या कांय जाणांचे नामे सांपडूंक ना. जाल्यार नामे सांपडिल्ल्या चार जाणांक १ डिसेंबराक हाजीर रावपाचो समन्स जारी केला.
शुक्रारा सुनावणे वेळार आनीक कांय जाणांक हाजीर रावपा खातीर समन्स धाडिल्ले. तांतलो एक साक्षीदार पुण्याक रावता. ताका लागून सुनावणेक हाजीर रावूंक पावलो ना अशें सांगलें. एका साक्षीदाराक मरण आयलां. एका साक्षीदाराचें समन्स उरवा पुलीस स्टेशनांत धाडलां. तिघा साक्षीदारांचे नामे मेळूंक ना. एका साक्षीदाराचेर कोल्हापुरांतल्या हॉस्पिटलांत उपचार सुरू आसा, अशें सांगलें. ते प्रमाण नामे सांपडूंक नाशिल्ल्या तिगा साक्षीदारांक नवो समन्स जारी करपाक सांगलां. तांकां १५ डिसेंबराक सकाळच्या १० वरांचेर हाजीर रावपाक सांगलां. आदले सुनावणेंत चार साक्षीदारांचे नामे सांपडिल्ल्याचें न्यायालयांत सांगलें. तांकां १ डिसेंबराक १० वरांचेर न्यायालयांत सुनावणेक हाजीर रावपाचो समन्स जारी करपाक सांगलां. हे विशीं फुडली सुनावणी १ डिसेंबराक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
