भांगरभूंय | प्रतिनिधी
मडगांव, प्रतिनिधी : मडगांव पालिकेन एसजीपीडीए मार्केटांतले ५ टीपीडी प्रकल्प सध्या बंद केल्ल्याचें पर्यावरणमंत्री आलेक्स सिक्वेरा हांणी केल्ले पळोवणें दिसून आयलें. आमदार विजय सरदेसाय हांणी तांकां पळोवणी खातीर आपयल्ले. मंत्री सिक्वेरा हांणी अधिकार्यांक सुचवण्यो करतना रोखडेच प्रकल्प सुरू करतले अशी गवाय दिली. तशेंच प्रकल्पाचें ऑडीट करतले अशेंय स्पश्ट केलें.
सिक्वेरा हांणी आमदार सरदेसाय हांचे मागणे प्रमाण तांणी मडगांव पालिकेच्या बायोमिथेनेशन प्रकल्पाची पळोवणी केली. पळोवणे उपरांत मंत्री सिक्वेरा हांणी पालिकेक संबंदीत प्रकल्पा विशी नोटीस जारी करची अशें गोंय प्रदूशण नियंत्रण म्हामंडळाचे अधिकारी संजीव जोगळेकार हांकां सांगलें. पालिकेचो ५ टीपीडी बायोमिथेनेशन प्रकल्प चलना पूण आनीक एक प्रकल्प हाडपाची तयारी चल्ल्या. थर्माकोल वा नुस्त्याचो कोयर हाचेर ह्या प्रकल्पांत प्रक्रिया जायना. वीज निर्मिती जायना. पालिकेन नाका म्हणटा आसतना अशेच तरेचो आनीक एक प्रकल्प घाउक मासळी मार्केटांत घालपाचें थारलें. नुस्तें मार्केटांतल्या कोयराचेर प्रक्रिया जायनाशिल्ल्यान अशे तरेच्या प्रकल्पांची गरज ना. प्रकल्पाच्या आशिकुशीक व्हडा प्रमाणांत घाण येता आनी वेपार्यांच्या वेवसायाक फटको बसता, अशें आमदार सरदेसाय हांणी सांगलें.
जाल्यार मंत्री सिक्वेरा हांणी प्रकल्प दिल्ले मजतींत सुरु जातले. मुख्याधिकारी हे पालिकेंतले सरकारी अधिकारी आशिल्ल्यान तांची जापसालदारकीय आसा. प्रकल्पा विशीं प्रदूशण नियंत्रण खात्यान थारयिल्ल्या वेळार जर मडगांव पालिके कडेन कामां जावंक ना जाल्यार कारवाय करतले अशें सिक्वेरा हांणी सांगलें. तशेंच बायोमिथेनेशन प्रकल्प सुरु आसल्यार तातूंतलें घाणयारें उदक खंय वता, असो प्रस्न मुखार येता अशेंय तांणी म्हणलें.
बायोमिथेनेशन प्रकल्पाची पळोवणी
बायोमिथेनेशन प्रकल्पाची पळोवणी केली तेन्ना हो प्रकल्प बंद आशिल्ल्याचें कळ्ळें. बेगीनूच हो प्रकल्प ताचे तांकी प्रमाण सुरू जातलो. तश्यो सुचवण्यो केल्यात. ह्या प्रकल्पाचें ऑडीट करपाकूय सांगलां. तशें जावंक ना जाल्यार संबंदीत अधिकार्यांचेर कारवाय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
