भांगरभूंय | प्रतिनिधी
सबरजिस्ट्रार अधिकारी म्हणटात, सगले कर्मचारी प्रामाणीक
मडगांव, प्रतिनिधी : दक्षीण गोंय जिल्होधिकारी कार्यालयांतल्या सबरजिस्ट्रार कार्यालयां भायर कांय एजंट वावुरतात. दाखलो, प्रमाणपत्रा खातीर आनी तांतले दुरुस्ती खातीर एका प्रमाणपत्रा फाटल्यान २५० रुपया आनी दुसर्या दिसा प्रमाणपत्र जाय आसल्यार ५०० रुपया घेतात. एजंटाक पयशे दिल्ले रोझी नांवाचे जागृत आनी धाडसी बायलेन ही म्हायती दिली. मात, संबंदीत अधिकार्यांनी आमचे कर्मचारी केन्नाच, कोणाच कडल्यान पयशे घेनात. अशें जर जाता जाल्यार कारवाय करतले, अशें आस्वासन दिलें.
दक्षीण गोंय जिल्होधिकारी कार्यालयांत विवीध कामां निमतान नागरीक येतूच आसतात. आपलीं कामां रोखडींच जावचीं, अशी आस्त सगळ्यांकूच आसता. पूण सरकारी काम म्हळ्यार उण्योच ४-५ फावटी मारच्यो पडटात. सामान्य जनतेचे हे परिस्थितीचो फायदो घेवन आरटीओ कार्यालयां प्रमाण, कांय एजंट दक्षीण गोंय जिल्होधिकारी कार्यालयांत कार्यरत आसात. फटाफट कामां करून दिवपाचें आस्वासन दिवन ते लोकां कडल्यान पयशे घेतात. लोकूय आपलीं कामां बेगीन जावचीं देखून पयशे दितात.
सबरजिस्ट्रार कार्यालयांत प्रमाणपत्रांत दुरुस्ती करपा खातीर आयिल्ले रोझी हे बायलेन एजंटा कडल्यान प्रमाणपत्रा खातीर फाॅर्म भरून दिवप आनी तें मेळोवन दिवपा खातीर पयशें घेतात, हें प्रकरण उक्ताडार हाडलें.
सबरजिस्ट्रार कार्यालया भायल्या व्हरांड्यांत आशिल्ल्या एजंटाक प्रमाणपत्रा खातीर २५० रुपया दिले. आपूण ताका १०० रुपया दितां अशें सांगलें. ताचेर ताणें आनीक कांय जाणांक पयशे दिवचे पडटात अशें सांगलें. तशेंच रोखडेंच दुसर्या दिसा प्रमाणपत्र जाय जाल्यार ५०० रुपया घेता अशेंय सांगलें. हे विशीं संबंदीत एजंटांक विचारलें, तेन्ना तांणी हो आरोप न्हयकारलो आनी फॉर्म भरपा खातीर फक्त ३० रुपयाच घेतल्यात, अशें सांगलें.
सबरजिस्ट्रार अधिकारी सुनील रायकार हांणी, नागरिकांची बरे तरेन वेवस्था जावचे खातीर सरकारी कर्मचारी कार्यरत आसतात. जल्म वा मरण प्रमाणपत्र अर्ज केल्या उपरांत तीन ते चार दिसांनी दितात. ताका लागून कोणाकूच पयशे दिवपाची गरज ना. खंयचोच कर्मचारी पयशे घेना. एजंट पयशे घेता जाल्यार ताचेर कारवाय करतले, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
