भांगरभूंय | प्रतिनिधी
पणजी : नगरनियोजन खात्याच्या कलम ३९ (अ) वेल्यान नगरनियोजन मंत्री विश्वजीत राणे हांच्या दोनापावलच्या बंगल्या सामकार काडिल्ल्या मोर्चा प्रकरणांत आमदार ॲड. कार्लुस फेरेरा हांकां पणजी पुलिसां कडल्यान चवकशे खातीर समन्स धाडला.
मेळिल्ले म्हायती प्रमाण, ह्या प्रकरणांत फुडले तपासणे खातीर फेरेरा हांकां आयज, बुधवारा २९ एप्रिलाक सांजेवेळार ४ वरांचेर पणजी पुलीस स्टेशनाचेर हाजीर रावपाक सांगलां.
गोंयांत फाटल्या कांय दिसां फाटल्यान नगरनियोजन खात्यांतले ३९ (अ) कलमा आड व्हड आंदोलन केल्लें. पणजेच्या आझाद मैदानार हें आंदोलन सुरू आशिल्लें आनी ताका बरो प्रतिसादूय मेळिल्लो. उपरात तांतल्या कांय आंदोलनकर्त्यांनी मंत्री विश्वजीत राणे हांच्या दोनापावलच्या घरा मोर्चा व्हेल्लो. तातूंत लोक व्हडा संख्येन वाटेकार जाल्ले. तातूंत कॉंग्रेस पक्षाचे आमदार ॲड. कार्लुस फेरेरा हांचे सयत हेर विरोधी आमदार, नेते वाटेकार जाल्ले.
ह्या प्रकरणांत पुलिसांनी आमदार ॲड. फेरेरा हांचे सयत हेरां आड गुन्यांव नोंद केल्लो. आतां ह्या प्रकरणांत चवकशे खातीर पुलिसांनी तांकां समन्स धाडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
