भांगरभूंय | प्रतिनिधी
पणजी, बातमीदार : रामतळें – हळदोण्यां पालखे वेळार पण्टेंत तेला बदला चुकून पॅत्रॉल घालून ती पेटयतना उजो लागून जखमी जाल्ली दिक्षिता नायक (३२) हिका उपचारां मजगतीं आयज सकाळीं मरण आयलें. ही घडणूक फाटल्या १३ नोव्हेंबराक घडिल्ली.
रामतळें पालखेक येवकार दिवपाक ती पण्टी पेटयताली. पालखी घरा लागीं पावता तें पळोवन तिणें गडबडींत पण्टेंत तेला बदला पॅत्रॉल घालें आनी उजो लागलो. हातूंत तिच्या हातांतली पॅत्राॅलाची बाटली तिच्या आंगाचेर पडली आनी ती उजो लागून गंभीर जखमी जाल्ली. भोंवतणच्या लोकांनी उजो पालोवपाचो यत्न केलो. ती ७० टक्के लाशिल्ली.
रोखडीच तिका म्हापशेंच्या जिल्हो हॉस्पिटलांत व्हेली, उपरांत फुडल्या उपचारा खातीर बांबोळे जीएमसींत. फाटल्या १० दिसां सावन जगपा खातीर झुजतना आयज सकाळीं तिका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
