भांगरभूंय | प्रतिनिधी
नवी दिल्ली, खबरां संस्था : कोरोना म्हामारीच्या काळांत मरण येवप्यांचो आंकडो वाडचो न्हय देखून व्हडा प्रमाणांत लसीकरण मोहीम राबयल्ली. देशांत २ अब्जां परस चड लसींचे डोस दिले.
फाटल्या देड वर्सांत काळजाचो आताक लागून मरण येवपी तरणाट्यांचो आंकडो वाडला. ताका लागून ह्या वाडपी आंकड्या फाटलें कारण कोरोना लस बी न्हय न्ही? अशी चर्चा सुरू जाल्या. केंद्र सरकारा खाला येवपी देशांतली सगळ्यांत व्हडली भलायकी संघटना भारतीय वैजकी संशोधन परिशदेन (ICMR) कोरोना वॅक्सीन आनी वाडपी हार्ट अटॅकां मदीं कितें संबंद आसा हें उक्तें केलां.
आयसीएमआरान कोरोनाची लस आनी काळजाचो आताक जाल्ल्या दुयेंतींचेर अभ्यास केलो. तरणाट्यांच्या मरणांत अचकीत वाड जावपाक कोरोनाची लस दिवपाचो कितें संबंद आसा काय? ह्या अभ्यासा वेळार आमी ह्या प्रस्नाची जाप सोदपाचो यत्न केलो. भारतांत कोरोनाच्या लसीकरणाक लागून तरणाट्यां मदीं मरण येवपाचें प्रमाण वाडूंक ना अशें आयसीएमआरान आपल्या अभ्यासांत सांगलां. कोरोना म्हामारी पयलीं सावनूच आशिल्लीं दुयेंसां, कुटुंबांत पयलीं अशे तरेन एका वांगड्याक मरण येवप, तशेंच लायफस्टायलींत बदल अश्या गजालींक लागून तरणाटे पिरायेर मरण येवपाचें प्रमाण वाडलां, अशें आयसीएमआरच्या अभ्यासांत म्हणलां.
एकूच लस घेतल्यार?
कोरोना लसीकरणाचो अचकीत मरण येवपा कडेन कांयच संबंद ना अशें आयसीएमआरान ह्या अभ्यासाच्या अहवालांत स्पश्ट केलां. कोरोना म्हामारीची लागण जावची न्हय हे खातीर देशभर चलयल्ले लसीकरण मोहिमेंत एकतरी लस घेतिल्ल्यां मदीं मरण येवपाचो धोको सामको उणो जाला, अशें आयसीएमआरान सांगलां.
अकस्मात मरण येवपाचें कारण कितें?
कोरोनाक लागून हॉस्पिटलांत दाखल जावपाचो इतिहास आसल्यार, फाटल्या काळांत कुटुंबांतल्या कोणायकूय अचकीत मरण आयल्यार, मरणाच्या ४८ वरां आदीं सोरो पियेवप वा ड्रग्साचो घेवप वा चड व्यायाम केल्यार अचकीत मरण येवपाची शक्यताय वाडटा अशें आयसीएमआर हांणी सांगलां.
हो अभ्यास केन्ना केलो?
आयसीएमआरान हो अभ्यास १ ऑक्टोबर २०२१ ते ३१ मार्च २०२३ मजगतीं केला. हातूंत देशांतल्या ४७ हॉस्पिटलांचो आसपाव आसा. ह्या अभ्यासांत १८ ते ४५ वर्सांच्या तरणाट्याचो आसपाव आशिल्लो. हांतल्या कोणाकूच केन्नाच भलायके विशीं कागाळ नाशिल्ली. ह्या अभ्यासांत ज्या लोकांनी कोरोनाच्यो २ लसी घेतल्यात तांकां अचकीत मरण येवपाची शक्यताय उणी आशिल्ल्याचें कळून आयलां अशें आयसीएमआरान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
