भांगरभूंय | प्रतिनिधी
राज्य सहकारी बँकेन फारीक करूंक ना भाडें, आतां तें दिवपाचें उतर
फोंडें, प्रतिनिधी: गोंयचो एकूच संजीवनी साकर कारखानो कांय जाणां खातीर भांगराची खण थारला. फाटल्या १० वर्सांनी खुबशे घोटाळे उक्ताडार आयले. संजीवनीच्या जाग्यार बेकायदेशीर चिरे खण सुरू करून कांय जाणांनी बरेंच जोडलें. निमाणें कोणाचेरूच कारवाय जावंक ना. फाटल्या कांय दिसां सावन संजीवन कारखान्या विशीं अजाप करपा सारक्यो घडामोडी घडल्यो. कारखान्याच्या वाठारांत आशिल्ले गोंय राज्य सहकारी बँकेन आयज मेरेन संजीवनीक भाडें दिवंक ना. हे विशीं प्रशासक सतेज कामत हांणी पत्र बरयलें तेन्ना बँकेन फाटल्या ऑक्टोबर सावन भाडें दिवपाचें थारायलां.
संजीवनी साकर कारखान्यांत करोडांनी रुपयांची उलाढाल करपी गोंय राज्य सहकारी बँकेन आयज मेरेन खंयचेंच भाडें दिवंक नाशिल्लें. फाटल्या वर्सा प्रशासकीय पदाचो ताबो घेतिल्ल्या सतेज कामत हांणी सेगीत कारखान्याचो महसूल वाडोवपा खातीर यत्न केला. फाटलें वर्सभर पडींग जाग्यार भाजयेचें पीक, पेट्रोल पंप, पे पार्कींग आनी हेर वाठारांतल्यान महसूल एकठांय करतना बँकेन आतां मेरेन कसलेंच भाडें दिवंक नाशिल्ल्याचें तांकां कळ्ळें. ताका लागून ऑक्टोबर म्हयन्यांत बँकेक पत्र धाडून तांणी भाडें दिवपाची मागणी केली. त्या पत्राची बँकेन रोखडी दखल घेवन ऑक्टोबर म्हयन्या सावन भाडें दिवपाचें लेखी आस्वासन दिलें. भाडें खंयच्या वर्सा सावन घेवपा खातीर सतेज कामत हांणी मुख्यमंत्री प्रमोद सावंत हांकां पत्र धाडून निर्णय घेवपाची सुचवणी केली. ताका लागून बँकेकडल्यान बेगीनूच संजीवनीक महसूल मेळटलो अशें दिसून येता.
प्रशासक सतेज कामत हांणी जून म्हयन्या सावन संजीवनीच्या जाग्यार नुस्तें वेवसाय सुरु करपाची सगळी तयारी केल्ली. ताका लागून प्रशासकान नुस्तें खात्याच्या अधिकार्याक पत्र बरयल्लें. पूण त्या पत्रा कडेन आडनदर जाली. ताका लागून हो प्रयोग सुरू जावचे पयलींच शेणलो. नुस्तें वेवसायाक ह्या वाठारांत व्हड मागणी आशिल्ल्यान प्रशासकान सगळी तयारी केल्ली. पूण नुस्तें खात्याचे सगळे अधिकारी हेर कामांत व्यस्त आशिल्ल्यान संजीवनीच्या जाग्यार नुस्तें वेवसाय सुरु करपा खातीर मार्गदर्शन करूंक नाशिल्ल्याची म्हायती सुत्रांकडल्यान मेळ्ळ्या.
फाटल्या जायत्या वर्सां सावन संजीवनी वाठारांत कार्यरत आशिल्ल्यान गोंय राज्य सहकारी बँकेन केन्नाच भाडें, वीज आनी उदकाचें बील दिवंक ना. पूण पत्र धाडल्या उपरांत ऑक्टोबर म्हयन्यांत भाडें दिवपाक मान्य केल्ल्याचें तांणी सांगलें.
संजीवनी साकर कारखान्याच्या पडींग वाठारांत वेवसाय सुरू करपा खातीर पावसा पयलीं सगळी तयारी सुरू केल्ली. पूण नुस्तें खात्याच्या अधिकार्यांनी गरजेचें मार्गदर्शन करूंक नाशिल्ल्यान हो वेवसाय सुरू करूंक ना, अशें सतेज कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
