भांगरभूंय | प्रतिनिधी
सभापतींनी राज्यपालांक अपात्र करपा विशीं पत्र बरोवचें
पणजी, प्रतिनिधी : अपात्रताय याचिका प्रलंबित आशिल्ल्यान आलेक्स सिक्वेरा हे मंत्री जावपाक अपात्र थारतात. सभापतींनी राज्यपालांक सिक्वेरा हांकां अपात्र करपा विशीं पत्र बरोवचें, अशी मागणी काँग्रेसीन केल्या. प्रदेश काँग्रेस अध्यक्ष अमित पाटकार हांणी हे विशीं सभापती रमेश तवडकार हांकां निवेदन सादर केलां. सभापतींनी पत्र बरयलें ना, जाल्यार सिक्वेरा हांकां अपात्र करपा विशीं राज्यपालांची भेट घेतले, अशें पाटकार हांणी सांगलें.
पक्षा वतीन सभापतींच्या कार्यालयाक निवेदन सादर केलां. सभापती तवडकार हांची भेट घेवन ही मागणी करतले, अशें पाटकार हांणी सांगलें.
भाजपान पयलीं दिल्लें आस्वासन पुराय केलां, अशें सिक्वेरा हांणी मंत्रिपदाचो सोपुत घेतले उपरांत सांगलां. हाचो अर्थ मंत्रिपदा खातीर तांणी काँग्रेसींतल्यान भाजपांत प्रवेश केल्ल्याचें स्पश्ट जाता. कांय दिसांनी काँग्रेसींतल्यान भाजपांत गेल्ल्या आठ आमदारां पयकी आनीक कोणाक मंत्रिपद मेळप शक्य आसा, अशें तांणी सांगलें.
आठ आमदारां आड काँग्रेसीन अपात्रताय याचिका दाखल केल्या. ती प्रलंबित आसताना सिक्वेरा हांचो मंत्रिपदाचेर सोपुत कसो जालो? असो प्रस्न पाटकार हांणी केला. काँग्रेसीच्यो दोन अपात्रताय याचिका प्रलंबित आसा. एके याचिकेचेर सभापतींनी नोटिसो सुद्दा जारी करूंक ना. सिक्वेरा हांका मंत्री म्हूण अपात्र करचे, अशें पत्र सभापतींनी राज्यपालांक बरोवचे, अशी मागणी काँग्रेसीन केल्या. अपात्रताय याचिका प्रलंबित आसताना मंत्रिपदाचो सोपुत जावप ही लोकशायेची हत्या आसा, असो आरोप काँग्रेसीन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
