भांगरभूंय | प्रतिनिधी
पणजी, प्रतिनिधी: राज्य सरकार दर वर्सा आदल्या आनी आतांच्या १९ आमदारांच्या सुमार ३७ अनुदानीत हायस्कूल आनी उच्च माध्यमीक विद्यालयांचेर सुमार ५७.५१ कोटी रुपयांचो खर्च करता. ह्या १९ आमदारां मदल्या कांय जाणांच्या चार शाळाय आसात. दर वर्सा शिक्षकांचें वेतन वाडिल्ल्यान वर्सुकी ह्या खर्चांत वाड जायत आसा, अशी म्हायती शिक्षण खात्याच्या सुत्रांनी दिली.
ह्या आमदारांच्या १९ स्कुलांक सरकार अनुदान म्हणून दरवर्सा ७८ लाख रुपया दितात. हांगा कार्यरत शिक्षक आनी हेर कर्मचार्यांच्या पगारा खातीर सुमार ३० कोटी रुपया खर्च जातात. ह्या हायस्कुलांतलीं वाचनालयां आनी सुरक्षा रक्षकां खातीर सरकाराचे सुमार १६.५० लाख रुपया खर्च जाता, अशें सुत्रांनी दिल्ल्या कागदपत्रां वरवीं कळून आयलां.
ह्या आमदारांच्या सुमार १४ उच्च माध्यमीक विद्यालयांचेर दरवर्सा कोट्यांनी रुपया खर्च जाता. तांकां प्रोव्हिडंट फंडा खातीर (पीएफ) वर्साक १६.८२ कोटी रुपया दितात. पेन्शनाचेर ९.१८ कोटी, जाल्यार विद्यालयांचे दुरुस्ती खातीर वर्साक सुमार ६७.४६ कोटी रुपया खर्च जाता अशें स्पश्ट दिसून येता.
पयले मुख्यमंत्री स. भाऊसायब बांदोडकार ते आदले आमदार सिद्धार्थ कुंकळ्येंकार, आतांचे राज्यसभा खासदार सदानंद शेट तानावडे हांचे मेरेन सुमार १९ आदल्या आनी आतांच्या आमदारांचीं हायस्कुलां आनी उच्च माध्यमीक विद्यालयां राज्यांत सक्रीय आसात. हातूंत सगळ्यांत चड शाळा आतांचे मंत्री सुभाष शिरोडकार आनी आदले आमदार विनायक नायक हांच्यो आसात. आदले मुख्यमंत्री प्रतापसिंह राणे तशेंच सभापती रमेश तवडकार हांच्यो एकेकल्याचो तीन शाळो आसात. आदले मुख्यमंत्री स. भाऊसायब बांदोडकार, आदले केंद्रीय कायदो मंत्री अॅड. रमाकांत खलप, सदानंद शेट तानावडे, प्रताप गांवस, आदले मुख्यमंत्री लक्ष्मीकांत पार्सेकार, मंत्री बाबूश मोन्सेरात, सुरेश परुळेकार, पांडुरंग मडकयकार ह्या दरेकल्याचो दोन शाळो आसात. जाल्यार हेरांच्यो एक- एक शाळा आसात.
दर वर्सा राज्य सरकार शिक्षण खात्या खातीर सुमार २,४०० कोटी रुपया निधीची तरतूद करता. तांतले सुमार ५७.५१ कोटी रुपया ह्या आमदारांच्या शाळांचेर अनुदानाच्या रूपान खर्च जातात. दर वर्सा शिक्षक, प्राध्यापक तशेंच हेर कर्मचार्यांच्या वेतना मदीं वाड जायत आसता. ते प्रमाण दर वर्सा ह्या शाळांक मेळपी अनुदानांत उण्यांत उणी पांच टक्क्यां मेरेनची वाड सरकाराक करची पडटा, अशेंय सुत्रांनी सांगलें.
राज्यांत यत्ता पयली ते बारावी मेरेन २.७४ लाख विद्यार्थी शिक्षण घेतात. तांतले चडशे विद्यार्थी आमदारांच्या शाळांनी शिकतात. अनुदानीत शळांक लागून विद्यार्थ्यांक दर्जेदार शिक्षण मेळटा. मात राज्यांतल्या सरकारी शाळांतल्या विद्यार्थ्यांच्या आंकड्याचेर हाचो परिणाम दिसून येता. बालरथांक लागून पालक आपल्या भुरग्यांक सरकारी शाळेंतल्यान काडून अनुदानीत शाळांनी धाडटात. ताका लागून सरकारी मुळाव्यो शाळो विद्यार्थ्यां विणें पडल्यात अशें सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
