भांगरभूंय | प्रतिनिधी
सांखळी, प्रतिनिधी: सांखळे २६ नोव्हेंबराक त्रिपुरारी पौर्णिमा उत्सवा निमतान विवीध कार्यावळींचें आयोजन केलां, अशी म्हायती कला आनी संस्कृती मंत्री गोविंद गावडे हांणी दिली.
राज्य पांवड्या वयले उत्सव समितीची बसका घेतले उपरांत मंत्री गावडे उलयताले. ह्या वेळार मयेंचे आमदार प्रेमेंद्र शेट, पर्येंची आमदार देविया राणे आनी हेर मानेस्त हाजीर आशिल्ले. सुरवातेक कला आनी संस्कृती संचालक सगूण वेळीप हांणी येवकार दिलो आनी कार्यावळीची म्हायती दिली.
व्हाळवाट न्हंयेच्या पात्रांत जावपी ‘नौकाविहार’ सर्त गोंयां सयत शेजारच्या राज्यांनी नामनेक पावल्या. हजारांनी भाविकांचे हाजेरींत जावपी ह्या उत्सवाचें खाशेलपण म्हळ्यार बोटींची सर्त. पर्यटन, कला आनी संस्कृतीक, म्हायती आनी प्रसिद्धी खातें आनी विठ्ठलापूर दिवाळी उत्सव समिती हांच्या जोड पालवान हो उत्सव मनयतात. हे सर्तींत आकर्शक आनी पर्यावरणाक अनुकूल अश्यो बोटी वांटो घेतल्यो. थर्माकॉल पसून केल्ल्या बोटींचो सर्ती खातीर विचार करचे नात.
सांजेवेळार ७ वरांचेर भगवान श्रीकृष्ण मिरवणूक, उपरांत व्हाळवाट न्हंयेच्या पात्रांत दिपदानाची कार्यावळ जातली. श्री पांडुरंग देवस्थानच्या आंगणांत ७.३० वरांचेर सांस्कृतीक कार्यावळ, रातच्या १०.३० वरांचेर श्री विठ्ठल-रखुमाईची पालखी मिरवणूक जाल्यार ११ वरांचेर त्रिपुरासूर वध करतले.
सर्तींत वांटेकार जावप्यांनी थळावे दिवाळी उत्सव समितीकडेन संपर्क करचो, अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
