भांगरभूंय | प्रतिनिधी
नवी दिल्ली, खबरां संस्था: उच्च न्यायालयांतल्या कांय न्यायमुर्तींच्या बदलीची अधिसुचवणी काडपा खातीर कळाव केल्ले खातीर सर्वोच्च न्यायालयान सोमारा केंद्र सरकाराक धारेर धरलें. केंद्रान बदलीची अधिसुचोवणी फुडें धुकलिल्ले हे न्यायमुर्ती गुजरातांतले जावन आसात. तांचे बदलीची शिफारस सर्वोच्च न्यायालयाच्या न्यायवृंदान केल्ली.
न्यायाधीश संजय किशन कौल आनी न्यायमूर्ती सुधांशु धुलिया हांच्या खंडपिठानय उच्च न्यायालयाच्या न्यायाधीशांची बदली करपा विशीं केंद्र सरकारान घेतिल्ल्या ‘पसंती’ पद्दतीचेर प्रस्नचिन्न उबें केलें आनी तातूंतल्यान बरो संकेत मेळना अशी टिप्पणी केली. खंडपिठान ११ न्यायाधीशांची बदली खातीर केंद्रा कडेन शिफारस केल्ली. तातुंतल्या फकत पांच न्यायाधीशांची बदली जाल्या. जाल्यार स न्यायाधीशांची बदली करपाची शिफारस अजून प्रलंबीत आसा. ह्या स न्यायाधीशांतले चार न्यायाधीश गुजरातांतले आनी अलाहाबाद, दिल्ली उच्च न्यायालयांतल्या १-१ न्यायाधीशांचो आसपाव आसा.
सर्वोच्च न्यायालयाच्या न्यायवृंदान शिफारस केल्या उपरांतूय न्यायमुर्तीच्या बदल्यांची अधिसुचोवणी काडपाक केंद्र सरकार कळाव करता असो आरोप करपी दोन याचिकांचेर सुनावणी सुरू आसा.
सर्वोच्च न्यायालयान न्यायमुर्ती नियुक्ती, बदल्यां वयल्यान केंद्र सरकार, जाल्यार प्रलंबीत विधेयकां विशींचो प्रस्न राज्यपालां मुखार परत हाडलो. न्यायमुर्तीच्या बदल्यां विशीं वेंचीक नांवांक ‘पसंती’ दिवपाचे केंद्राचे भुमिकेचेर न्यायालयान पड्डो ओडलो. दुसरे कडेन तमिळनाडूच्या राज्यपालांनी विधेयकां तीन वर्सां कित्याक प्रलंबीत दवरलीं असो प्रस्न विचारून न्यायालयान केरळांतलीं विधेयकां प्रलंबीत प्रकरणांत थंयच्या राज्यपाल आनी केंद्राक नोटीस धाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
