भांगरभूंय | प्रतिनिधी
पेडणें, प्रतिनिधी : 2023 वर्साचो पयलो ‘मिस डेफ इंडिया’ हो किताब जिखपी मोरजेची विनिता शिरोडकार ‘मिस वर्ल्ड’ जावंक दक्षीण आफ्रिकेंत वचूंक आयज, 17 नोव्हेंबराक भायर सरली. दक्षीण आफ्रिकेंत जावपी मिस वर्ल्ड डेफ सर्तीत ती भारताचें फुडारपण करतली.
विनिता शिरोडकार हिणें 2023 चो ‘मिस इंडिया’ हो किताब जोडिल्लो. हो पुरस्कार मेळटकच तिचो आत्मविस्वास वाडला. समाजा खातीर हांव कितें देणें लागतां आनी तें हांव दिवंक शकतां ह्या ध्यासान आनी इत्साशक्तीच्या बळग्यार तिणें ‘मिस इंडिया’ हो मुकूट मेळयला आनी आतां ती 19 ते 29 नोव्हेंबर ह्या दिसांनी आफ्रिकेंतल्या टांझानियांत जावपी वर्ल्ड डेफ सर्तींत भारताचें फुडारपण करतली. ते खातीर ती आयज दक्षीण आफ्रिकेक वचूंक भायर सरल्या. तिका आयज घरच्यांनी आनी बरें मागप्यांनी निरोप दिलो.
विनिता शिरोडकार जल्मतनाच मूकबधीर आशिल्ल्याचें तिच्या आवयबापायक कळ्ळें. तिच्या फुडारा विशीं आवयबापायक हुसको जावंक लागलो. मात देवान तिका बुद्दीमत्तेचें वरदान दिल्लें. दिसपाक देखणी आशिल्ली विनिता अभ्यासांतूय हुशार आसा. हे हुशारकायेच्या बळग्यार ती येस जोडत गेली. विशेश भुरग्यां खातीर आशिल्ल्या संजय उच्च माध्यमीक विद्यालयांतल्यान तिणें बारावेंत 76 टक्के गूण मेळयिल्ले.
विनिताक नाचाची आनी चित्रकलेची आवड आसा. प्रवास करपाक आवडटा. पूण बापूय भायर पडटकच भुरग्यांचो भार सांबाळपाची जापसालदारकी तिचे आवयचेर पडली. तिची आवय मोरजे ल्हानसो गाडो घालून रस्सा आॅम्लेट, पाव- भाजी विकता. ह्या ल्हानश्या वेवसाया वरवीं ती घर संवसार सांबाळटा आनी भुरग्यांच्या शिक्षणाचो खर्चूय भागयता.
रातीं साडे इकरा मेरेन गाडो चलोवपी विनिताची आवय भुरगीं व्हड जावचीं आनी तांणी नांव जोडचें हो हावेस बाळगून आसा. आपली धूव भारताचें फुडारपण करपा खातीर दक्षीण आफ्रिकेंत वता म्हणून ती आनंदीत जाल्या.
मोरजेकारांनी तशेंच आमदार जीत आरोलकार, सरपंच मुकेश गडेकार, जिल्लो पंचायत वांगडी सतीश शेटगांवकार आनी हेर मानेस्तांनी विनिताक शुभेत्सा दिल्यात आनी ती जैतिवंत जावन गोंयांत परततली असो विस्वास उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
