भांगरभूंय | प्रतिनिधी
आंदोलन करपी कारापुरच्या मुंडकारांक कागदपत्रां सादर केल्यार मेळटले हक्क
लोढाच्या प्रकल्पा विशीं संबंधीत खातीं करतलीं विचार
पणजी :आंदोलन करपी कारापूर – सर्वणच्या ग्रामस्थांनी कूळ वा मुंडकार जागे विशीं जीं कागदपत्रां आसात, तीं तांणी मामलेदारा कडेन सादर करचीं. कागदपत्रांचेर आधारीत फावो तो लाव वा हक्क मुंडकारांक मेळटलो, अशें मुख्यमंत्री डॉ. प्रमोद सावंत हांणी म्हणलां. लोढाच्या प्रकल्पा विशीं संबंदीत खातीं विचार करतलीं, अशें तांणी सांगलें.
लोढाच्या प्रकल्पाविशीं मात मुख्यमंत्र्यांनी ठोस अशें आस्वासन दिवंक ना. कारापूर – सर्वणच्या ग्रामस्थांनी आजून मेरेन कसलींच कागदपत्रां मामलेदारांकडेन सादर करूंक नात. हाका लागून तांचे हक्का विशीं आजून मेरेन कसलोच निर्णय जावंक ना, अशें मुख्यमंत्र्यांनी सांगलें.
गांवकार फाटले कितलेशेच दीस पंचायती मुखार धरणें आंदोलन करतात. पंचायत वाठारांत लोढाच्या घरनिर्माण प्रकल्पाक तांचो विरोध आसा. हो प्रकल्प रद्द करचो अशी तांची मागणी आसा. आंदोलन करपी ग्रामस्थांनी मुख्यमंत्री डॉ. सावंत हांचे कडेन चर्चा केली. चर्चे उपरांत मुख्यमंत्र्यांनी ही म्हायती दिली. ग्रामस्थांक कूळ वा मुंडकार विशींचीं कागदपत्रां सादर करपाक हांवें सांगलां, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
