भांगरभूंय | प्रतिनिधी
पणजीः बेगीनूच सरकार पंचायतींतल्यान सॅनिटरी पॅड, अडल्ट आनी बेबी डायपर, तशेंच चिकन आनी मटणाचो कोयर एकठांय करतलें. हाचे खातीर शुल्क घेवचे नात अशें मुख्यमंत्री डॉ. प्रमोद सावंत हांणी सांगलें. बुधवारा पणजे पंचायती राज्या दिसा निमतान आयोजीत केल्ले कार्यावळींत ते उलयताले. ह्या वेळार मंत्री मॉविन गुदिन्हो, संचालक महादेव आरोंदेकार, घन कोयर वेवस्थापनाचे वेवस्थापकीय संचालक हरीश हडकोणकार, रेश्मा बांदोडकार, सिद्धार्थ गांवस देसाय आनी हेर अधिकारी हाजीर आशिल्ले.
सध्या दरेका गांवांतल्या सॅनिटरी पॅड, डायपरा सारकिल्ल्या कोयराचो विलो लावप कठीण जालां. पंचायतींनी असो कोयर वेगळो सांठोवपाक जाय. फोंड्यां जैव वैजकी कोयर प्रकल्प चलोवपी एजन्सी दर दोन दिसांनी हो कोयर एकठांय करतली. तशेंच चिकन आनी मटण गाडयांनी करपी कोयर पोल्ट्री असोसिएशन एकठांय करतले. कोयर वेवस्थापनांक, पंचायतींक खाशेलो निधी दिवपाचो आमी विचार करतात. पूण ते खातीर पंचायतींनी कोयर कर वसूल करपाची गरज आसा, अशें मुख्यमंत्र्यान मुखार म्हणलें.
कोयर वेवस्थापनाचेर सरकार वर्साक ५०० कोटी परस चड रुपया खर्च करता. कोयर कंत्राटदाराच्या कामाचेर नदर दवरपा खातीर जीपीएस ट्रॅकिंग सुरू जालां. ताका लागून ताणें कितलो कोयर एकठांय केला आनी तो ताचो कसो विलो लायता हाची म्हायती मेळपाक लागल्या. पंच, सरपंच सारक्या लोकप्रतिनिधींनी फकत गटार, पेव्हर ब्लॉक बांदप सारकिल्लीं कामां करचीं न्हय. तांणी लोकांक उपेगी थारतलीं, पंचायती स्वयंपूर्ण जातल्यो अशीं कामां करचीं. गांवांत एक सभाघर बांदून तें भाड्याक दिल्यारूय पंचायतीक येणावळ मेळपाक शकता.
दरेके पंचायती खातीर तंत्रीक सहाय्यक
पंचायत खात्या वतीन मे म्हयन्या उपरांत दरेक पंचायतींत तंत्रीक सहाय्यकाची नेमणूक करतले. सगल्या पंचायतींनी एआय आधारीत अटेंडन्स प्रणाली आनी हेर तंत्रज्ञानाचो वापर सुरू करचो असो उलो मंत्री मॉविन गुदिन्ह हांणी मारलो.
हेल्थ विथ आयुर्वेद मोहिमेंत बदल
मुख्यमंत्र्यांनी सांगलें, हेल्थ विथ आयुर्वेद हे मोहिमे प्रमाण दरेका मतदारसंघांत भलायकी शिबिरां आयोजीत करपाचे आशिल्ले. मात वाडपी उश्णतायेक लागून अशीं शिबिरां घेवचीं नात. ताचे सुवातेर मुळावें भलायकी केंद्र, खाजगी आयुर्वेदीक हॉस्पिटलांत ही मोहीम २ ते ३१ मे मजगतीं चालीक लायतले. उपचाराचो सगलो खर्च सरकार दितलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
