भांगरभूंय | प्रतिनिधी
पणजी : मनीसबळ उदरगत महामंडळ आनी वेर्णा उद्देगीक वसणुके वतीन आयोजीत केल्ल्या रोजगार मेळाव्याक लागून एका हजारां परस चड थळाव्यांक नोकरी मेळ्ळ्या. ह्यान फुडें दर म्हयन्याक दरेके उद्देगीक वसणुकेंत अशे मेळावे आयोजीत करपाचो आमचो यत्न आसतलो. मात हे खातीर उद्देगीक मळाचें फाटबळ गरजेचें आशिल्ल्याचें मुख्यमंत्री डॉ. प्रमोद सावंत हांणी सांगलें. बुधवारा पणजे जाल्ले वेवसाय सुरक्षा प्रदर्शन कार्यावळींत ते उलयताले. ह्या वेळार मंत्री नीलकंठ हळर्णकार, महाराष्ट्राचे मंत्री आकाश फुंडकर हाजीर आशिल्ले.
हाचे पयलीं गोंयांतल्या सिंधुदुर्ग वा कारवारांतल्यान मनीसबळ घेवपाचें काम सुरू आशिल्लें. गोंयच्या थळाव्या लोकांक रोजगार दिवपाचो आमी यत्न करतात. हे खातीर गोंय मनीसबळ उदरगत महामंडळ यत्न करता.वेर्णाच्या मेळाव्याक लागून १३०० थळाव्यांक नोकरी मेळ्ळ्या. फुडल्या कांय दिसांनी तांकां नेमणूक पत्रां दितले. जात्रेंत वांटो घेवपी कंपनींचे उपकार मानतां. मेळाव्यांत वाटेकार जाल्ल्या कंपन्यांचे हांव उपकार मानतां. सरकारान उद्देगीक मळाक सदांच मजत केल्या. आतां थळाव्यांक नोकरी दिवपा खातीर उद्देग क्षेत्रान फुडाकार घेवचो, अशेंय तांणी मुखार म्हणलें.
कामगार आनी कर्मचारी कामाचेर सुरक्षीत आसात हाची खात्री करप ही आमची सामुहीक जापसालदारकी. उद्देग, मुळावी बांदावळ आनी रोजगार हांचे वांगडाच उदरगतींत कर्मचार्यांची सुरक्षीतताय तितलीच म्हत्वाची. सुरक्षीत कामाची सुवात कामगारांक आनी परतून तांच्या कुटुंबांक स्थिरताय आनी मनाची शांती दिता. आयच्या काळांत सुरक्षीतताय फकत योग्य उपकरणांचेर न्हय तर योग्य तयारी आनी जागृताय हांचेर आदारून आसता. उद्देगीक उदरगत आनी कामगारांचें कल्याण हे दोनूय घटक हातांत हात घालूनच मुखार वचतूच आसतात.
विद्यार्थ्यां मदीं जागृताय
सरकार शाळांनी आनी तंत्रीक शिक्षण संस्थांनी विद्यार्थ्यां खातीर खास प्रशिक्षण कार्यावळी घडोवन हाडटा. ह्या कार्यावळींनी वीज सुरक्षीतताय, उजो पालोवप, आपत्तीची तयारी, आपत्कालीन प्रतिसाद, मानसीक भलायकी अशे विशय आसतात. ह्यो गजाली ल्हान पिरायेर शिकल्यार फुडाराक कामाचे सुवातेर, सदचे जिणेंतूय ताचो उपेग जाता अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
