भांगरभूंय | प्रतिनिधी
मडगांव, अजय लाड ः मडगांव रेल्वे स्टेशनाचेर विमानतळार पार्कींग सुविधाये प्रमाण कॉम्प्युटरायज्ड पगार पार्कींग पद्दत सुरू केल्या. म्हयनो सोंपता म्हणसर रेल्वेस्टेशन वाठारांत स वरां खातीर दोनचाकी १०, चारचाकी २० आनी मिनीबस ५० रुपया अशें शुल्क दिवचें पडटलें.
सध्या मडगांव रेल्वे स्टेशनाचेर सोडपा खातीर गाडी घेवन येवपी वाहन चालकां कडल्यान कसलोच शुल्क घेनात. फकत गाडी पार्क केल्यार वराचें शुल्क घेतात. माल व्हरपी टॅम्पोय सरळ रेल्वे स्टेशनाच्या वाठारांत येतात. गाडी पार्क करून गेल्ली व्यक्ती केन्ना येवन गाडी व्हरता हाची म्हायती मेळना. खुबश्यो दोनचाकी म्हयनोभर रेल्वेस्टेशन वाठारांत पार्क केल्ल्यो आसतात. पार्किंगची समस्या सुटची आनी प्रवाशांचे सुरक्षितते कडेन आडनदर जावची न्हय हे नदरेन कोकण रेल्वे प्रशासना कडल्यान विमानतळार जशें गाडयांचें शुल्क घेतात तशेंच हांगाय कॉम्प्युटरायज्ड यंत्रणां सुरु करतात. ते खातीर रेल्वे स्टेशनाच्या प्रवेशदारा कडल्या तिनूय मार्गाचेर पुलीस नाक्या प्रमाण वाहनां आडावपा खातीर गेट उबारल्या. गाडी प्रवेशदारांतल्यान भितर गेल्यार गाडयेक प्रवेशाची पावती दितले. गाडी स्टेशनाच्या वाठारांतल्यान भायर काडटना वेळा प्रमाण शुल्क घेतले. गरजेच्यो सुविधा उबारिल्ल्यान कॉम्प्युटर यंत्रणां बसयल्या उपरांत ही सुविधा सुरु करुन गाडयांचो वरभराचोच प्रवेश शुल्क घेतले.
वेळा प्रमाण शुल्क आकारणी
६ वरां खातीर पर्यटक बसीक ५० रुपया, पर्यटक मिनी बस ३० रुपया, चारचाकी वाहन २०, तीन चाकी वाहन १२, दुचाकीक १० आनी सायकली २ रुपया शुल्क. १२ वरां खातीर पर्यटक बसीक १०० रुपया, पर्यटक मिनी बस ८० रुपया, चारचाकी वाहन ६०, तीन चाकी वाहन २४, दोनचाकीक २० आनी सायकली खातीर ४ रुपया शुल्क आसा. २४ वरां खातीर पर्यटक बसीक २०० रुपया, पर्यटक मिनी बस १५० रुपया, चारचाकी वाहन १२०, तीन चाकी वाहन ४८, दोनचाकीक ४० आनी सायकली खातीर ८ रुपया शुल्क आसा.
शुल्क घेवपाक सुरवात
रेल्वे प्रशासना कडल्यान आजूनय ही सुविधा सुरु करूंक ना. आदले पार्कींग सुविधाय पाळपाक ठेकेदाराक सांगून लेगीत काल सावन ठेकेदारान नियुक्त केल्ले कामगार नवे यंत्रणे प्रमाण प्रवेशदाराचेर पावती दिवन भायर येतना वाहनां कडल्यान पयशे घेतात. हे विशीं कांय व्हिडियोय व्हायरल जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
