कासारवर्णे मिनी पूल कोसळपाचे स्थितींत
भांगरभूंय | प्रतिनिधी
पेडणें, प्रतिनिधी: कासारवर्णेंतल्या महादेव देवळा कडलो मिनी पूल केन्नाय कोसळपाचे स्थितींत आसा. ताचें सकयले वटेन आशिल्लें कॉंक्रीट पडपाक लागलां. लोखंड कळमेलां. जड वाहन वयल्यार गेल्यार तो कोसळपाचो भंय आसा. हो पूल दुरुस्त न्हय तर नवो बांदपाची मागणी कॉंग्रेसीचे फुडारी अॅड. जितेंद्र गांवकार, उदय महाले, भास्कर नारुलकार आनी हेरांनी केल्या.
बांदकाम खातें कशे तरेन असल्या कामां कडेन आडनदर करता हाचें हो पूल म्हळ्यार एक ताजें उदाहरण. हो पूल कोसळल्यार देवूळ आनी हेर वाठारांत वचपा खातीर पर्यायी रस्तो नाशिल्ल्यान फुडाराक व्हड आडखळी निर्माण जावं येतात. ताका लागून सरकारान कळाव करिनासतना नवो पूल उबारचो, असो थाराव थळाव्या पंचान पंचायतींत मांडिल्लो. पूण तो थाराव कोयराचे पेटयेंत गेलो. सरकारान बेगीनूच पूल उबारचो, अशी मागणी थळावे नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
