भांगरभूंय | प्रतिनिधी
वेवसाय बंद जावपाची वेवसायिकांक भिरांत
वास्को, प्रतिनिधी: मुरगांव बंदरांतल्या धक्का क्रमांक धा आनी इकरा संबंदी मुरगांव बंदर प्राधिकरण आनी डेल्टा इन्फ्रा लॉजिस्टीक्सांत जो समजिकाय करार जालो तो भौशीक करूंक नाशिल्ल्यान दुबाव निर्माण जाला. ह्या धक्क्याचेर फाटल्या कितल्याशाच वर्सां सावन विवीध वेवसाय करप्यां मदीं आपलो वेवसाय बंद जावपाचो भंय निर्माण जाला. ताका लागून प्राधिकरणान सामंजस्य करार लोकां मुखार दवरपाची गरज आशिल्ल्याचें मुरगांवचे आमदार संकल्प आमोणकार हांणी पत्रकार परिशदेंत सांगलें.
हे विशीं आमी मुख्यमंत्री डॉ. प्रमोद सावंत हांची भेट घेवन तांकां निवेदन दिलां. तांणी ह्या करारा संबंदी प्राधिकरणाच्या अध्यक्षा कडल्यान योग्य ती म्हायती घेवपाची सुचवणी उपजिल्होधिकारीक केल्ल्याचें तांणी स्पश्ट केलें. वेळ काळ पळोवन केंद्रीय मंत्री मुखार हो प्रस्न मांडपाचो यत्न करतले अशें आमोणकार हांणी म्हणलें.
आमदार आमोणकार हांचे वांगडा मुरगांव स्टिव्हेडोर्स संघटणेचे अध्यक्ष लिंडन रॉड्रिग्ज, पारकोट मरिटायम एजन्सी प्रायव्हेट लि.चे धनी विनोद पारकोट, कस्टम हावज एजन्टस् मारियो फुर्तादो, भवानी शिपिंगचे प्रतिनिधी नवीन शेट्टी हाजीर आशिल्ले.
सामंजस्य करार करतना संबंदीत एजन्सींक विश्वासांत घेवंक ना. तो भौशीकूय करूंक ना. हाचे फाटलें कारण स्पश्ट जावपाची गरज आसा. धक्को क्रमांक धा आनी अकरा संबंदी करार करपा खातीर पयलीं ५० कोटी रुपयांची बोली दवरिल्ली. ती उपरांत ३० कोटींचेर व्हेली. निमाण्या वेळार ह्या लिलावांत पांच जाण वांटेकार जाल्ले. तांतले डेल्टा सोडून हेर फाटीं सरिल्ल्यान डेल्टाक करारा खातीर आपयले. तेन्ना हो करार २७ कोटींचो केलो. हो करार करतना कांय नेम पाळूंक नाशिल्ल्याचो आरोप आमोणकार हांणी केलो.
जनरल कार्गो बर्थ क्रमांक धा आनी इकराचें खाजगीकरण पळयल्यार ह्या धक्क्यांचेर डेल्टाची मक्तेदारी जावचो भंय आसा. ताका लागून ह्या धक्क्यांचेर फाटलीं कितलींशींच वर्सां विवीध वेवसाय करप्यांच्या वेवसायाचेर व्हड परिणाम जावन तांकां वेवसाय बंद करचो पडटलो. तांचे कडेन काम करपी सुमार ५०० जाण बेरोजगार जावपाचो भंय आसा. ताका लागून ह्या धक्क्यांचेर फकत डेल्टाची मक्तेदारी चलतली काय हेरांकूय वेवसाय चालू दवरपाची परवानगी दितले हें स्पश्ट करपाची गरज आसा. प्राधिकरणान खंयचेय निर्णय घेतना थळाव्यांक विश्वासांत घेवपाची गरज आसा. हें प्राधिकरणा कडेन जायना, अशें आमोणकार हांणी म्हणलें.
मजगतीं, आमी कार्गो हाताळपा खातीर लागपी यंत्रांनी कोट्यांनी रुपयांची गुंतवणूक केल्या. जर आमकां वेवसाय बंद करचो पडलो जाल्यार आमचें लुकसाण कोण भरतले असो प्रस्न एका वेवसायिकान ह्या वेळार हाजीर केलो. ताका लागून त्या सामंजस्य करारांत कितें लिपलां तें भौशीक करपाची गरज आशिल्ल्याचें ह्या वेळार स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
