भांगरभूंय | प्रतिनिधी
यूथ काँग्रेसीची पुलिसां कडेन मागणी
मडगांव: फेरीवाले आनी भिकारी हांकां नावेली फेस्ता वेळार उपद्रव केल्ल्याची टिका करतनाच तांकां धांवडावपाची मागणी प्रदेश यूथ काँग्रेसीन दक्षीण गोंय पुलिसां कडेन केल्या. हे विशीं मडगांवच्या पुलीस उपअधिक्षकांक निवेदन सादर केलें.
दक्षीण गोंय युवक काँग्रेसीचे अध्यक्ष महेश नाडर हांणी हेर वांगड्यां सयत उपअधिक्षक संतोष देसाय हांची भेट घेवन तांकां नावेली फेस्ताक वचपी नागरिकांक जावपी त्रासाची म्हायती दिवन सुमार दोन सप्तकां चलपी ह्या फेस्ता खातीर अतिरिक्त पुलीस नेमपाची मागणी केली.
मौजमजा करपा खातीर लोक फेस्ताक येत आसतात. जे वेवसाय करतात, तांकां कसलीच समस्या उप्रासची न्हय. सगले सुरळीत चलूंक जाय. उपअधिक्षकांची भेट घेवन तांणी अतिरिक्त पुलीस नेमचे आनी फेरीवाले तशेंच भिकारी हांचेर खर कारवाय करची अशी मागणी केली. तांणी हे संबंदी पावलां उबारपाची गवाय दिल्या अशें नाडर हांणी सांगलें.
खूबशे थळावे आनी परंपरीक विक्रेते फेस्ता खातीर स्टॉल लायतात. खूबशे जाण अधिकृतपणान स्टॉल उबारतात. भिकारी फुटपाथार आनी रस्त्यार ठाण मांडून येरादारीक आडखळ निर्माण करतात. पुलिसांनी हाचेर कारवाय करूंक जाय. भीक मागप हो गुन्यांव आसा आनी ताका लागून पुलिसांनी हो उपद्रव फक्त फेस्ता वेळारूच न्हय जाल्यार हेर वेळार लेगीत आडावपा खातीर कारवाय करूंक जाय अशें तांणी म्हणलें.
ह्या वेळार दक्षीण गोंय यूथ काँग्रेस जिल्हो समिती वांगडी वालेंट बार्बोझा हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
