भांगरभूंय | प्रतिनिधी
दुबावीत सुनील कुमार राय हाका अटक
म्हापशें: खडपावाडो, कुचेली नळाच्या उदका वेल्यान जाल्ल्या वादांत कोयत्यान हल्लो करपाचो प्रकार घडलो. ह्या प्रकरणांत म्हापशें पुलिसांनी सुनील कुमार राय (मूळ बिहार) हाका अटक केली.
ही घडणूक बुधवारा सकाळीं 8.45 वरांच्या सुमाराक घडली. ह्या प्रकरणांत आशीश कुमार झा (मूळ बिहार) हाणें पुलिशेंत कागाळ दाखल केल्या.
दुबावीत आनी कागाळदार कुटूंब खडपावाडो कुचेली हांगा एकाच घरांत भाडेकार म्हूण रावतात. घडणुकेच्या वेळार तांचे मदीं नळाच्या उदका वेल्यान झगडीं जालीं. ह्या वेळार दुबावितान कागाळदाराक गाळी संवून मारपेट केली. तशेंच कोयत्यान हल्लो केलो. कोयत्याचो घाव लागून कागाळदार आशीश कुमार झा हो जखमी जालो. ह्या हल्ल्या उपरांत दुबावितान घडणूक थळा वयल्यान पळ काडिल्लो. जखमीचेर जिल्हो हॉस्पिटलांत उपचार केले.
घडणुकेची म्हायती मेळटकूच पुलिसांनी धांव घेतली आनी सोद करून दुबाविताक धरलो आनी ताब्यांत घेतलो. भादंसंच्या 504, 326 आनी 506(2) कलमा खाला गुन्यांव नोंद करून दुबावीत सुनील कुमार राय हाका अटक केली.
पुलीस उपनिरिक्षक सुनील पाटील, हवालदार सुशांत चोपडेंकार, कॉन्स्टेबल अक्षय पाटील आनी प्रकाश पोळेकार हांणी ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
