भांगरभूंय | प्रतिनिधी
पंचायतींनी जातलें प्रमाणपत्रांचें वांटप
पणजी : प्रधानमंत्री नरेंद्र मोदी हांणी शुभारंभ केल्ली विकसीत भारत संकल्प यात्रा गोंयच्या दरेका पंचायतीक 3 वरांची भेट दितली. लोकां मेरेन कल्याणकारी येवजण्यांची म्हायती दिवपा सयत पंचायतीक प्रमाणपत्रांचें वांटप जातलें. मुख्यमंत्री डॉ. प्रमोद सावंत हांणी ही म्हायती दिली.
दक्षीण गोंयांत चिखली पंचायती सावन गोंयांत यात्रेचो शुभारंभ जालो. मुख्यमंत्री डॉ. प्रमोद सावंत हांणी बावटो दाखोवन यात्रेचो शुभारंभ केलो.
2047 मेरेन भारत हो विकसीत देश करपाचो सोपूत ह्या वेळार मुख्यमंत्री डॉ. प्रमोद सावंत आनी हेर मंत्र्यांनी मंत्रालयांत घेतलो.
हाचे पयली प्रधानमंत्री नरेंद्र मोदी हांणी भगवान बिरसा मुंडा जयंती आनी जनजाती गौरव दिसा निमतान देशव्यापी विकसीत भारत संकल्प यात्रेचें उक्तावण खुंटी झारखंड हांगा केलें. मुख्यमंत्री डॉ. प्रमोद सावंत आनी हेर मंत्र्यानी व्हर्च्युअल पद्दतीन यात्रेंत वांटो घेतलो. हे यात्रे वतीन गोंय सरकारा वतीन केंद्र सरकारच्या तरेकवार येवजण्यांची म्हायती दितले.
पर्वरे मंत्रालयांत जाल्ले कार्यावळींत प्रधानमंत्री नरेंद्र मोदी हांच्या खुंटी झारखंड हांगा जाल्ल्या कार्यावळीचें थेट प्रक्षेपण सचिवालय सभाघरांत आयोजीत केलें. हाचे उपरांत मुख्यमंत्री डॉ. प्रमोद सावंत हांणी विकसीत भारत यात्रेक सुरुवात जाल्ल्याचे सांगलें. गोंयांत ही यात्रा बुधवारा सावन सुरू जावन 26 जानेवारी 2024 मेरेन चलतली. भारत 2047 मेरेन विकसीत देश जावपाचो हेत आशिल्ल्यान विकासात्मक आनी कल्याणकारी येवजण्यांनी जागृताय निर्माण करपा खातीर आनी जन भागिदारीची खात्री करपा खातीर विकसीत भारत संकल्प यात्रा येवजण केंद्र सरकारान आंखल्या. ह्या यात्रे वेळार जल जीवन मिशन, आयुश्यमान भारत येवजण, प्रधानमंत्री गरीब कल्याण येवजण, प्रधानमंत्री मुद्रा येवजण, जन धन येवजण, पीएम आवास येवजण, पीएम प्रणम येवजण आनी युरिया अनुदान येवजण अशा 20 येवजण्यांची मुखेल खाशेलपणां दाखयतले. यात्रेची व्हॅन गांवगिऱ्या आनी शारी वाठारांनी वचून प्रादेशीक भाशांनी ऑडिओ-व्हिज्युअल, ब्रोशर, पॅम्फ्लेट आनी हेर माध्यमां वरवीं म्हायती प्रसारीत करतले. हे यात्रेचो एक मुखेल घटक म्हणल्यार तातूंत येवजण्यां विशीं प्रसार करतले.
गोंयांतले दरेके पंचायतींनी ही गाडी वचून लोकांक केंद्र सरकारच्या येवजण्यांची म्हायती दितली. थळाव्या लोकां सयत हे गाडयेक सरपंच, पंच आनी स्वयंपूर्ण मित्र येवकार दितले, अशें मुख्यमंत्री डॉ. प्रमोद सावंत हांणी सांगलें. हरघर जल तशेंच उक्तडार शौच मुक्ती संबंधीची प्रमाणपत्रां पंचायतीक दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
