भांगरभूंय | प्रतिनिधी
हेडगीं गोरवां म्हामार्गार मदींच आयिल्ल्यान घडलो अपघात
पेडणें: हेडग्या गोरवांक लागून राष्ट्रीय म्हामार्गार अपघात वाडत आसात. ताचोच एक प्रकार म्हूण मंगळारा फांतोडेर मालप्यां केएल 02 बीएस 2668 क्रमांकाचो नुस्तें व्हरपी ट्रक उमथलो. सावंतवाडी मार्गान वचत आसतना मालपें राष्ट्रीय म्हामार्गार मदींच हेडगीं गोरवां आयलीं. ह्या गोरवां मदले एके गायेक वाटावपा खातीर चालकाचो तोल गेलो, आनी हो ट्रक दुभाजका वयल्यान दुसरे वटेन गेलो आनी उमथलो. पूण सुदैवान कोणाकूच कांयच जावंक ना. पूण ट्रकाचें मात लुकसाण जालें. हो अपघात भिरांकूळ आशिल्लो. फांतोडेर रस्त्या वयल्यान वाहनांची येरादारी उणी आशिल्ल्यान व्हड दुर्घटणा टळ्ळी.
उच्च न्यायालयाच्या आदेशा प्रमाण दरेक नगरपालिकेन आनी पंचायतीन आपआपल्या वाठारांतलीं हेडगीं गोरवां रस्त्यार ठाण मांडून बसतात, तांचो बंदोबस्त करपा खातीर खासा अनुदान सरकारान दिवन कोंडवाडे उबारपाची सुचोवणी केल्या. कांय पंचायतींचे कोंडवाडे आसात. पूण त्या कोंडवाड्यांनी गोरवां नात.
मजगतीं, गोरवां रस्त्यार ठाण मांडून बसपाचे प्रकार खूबशे कडेन दिसून येतात. ह्या हेडग्या गोरवांक लागून व्हड प्रमाणांत अपघात घडत आसतात. तातूंत मनशाचो जीव आनी गोरवांचोय बळी गेल्ल्याच्यो घडणुको हाचे पयलीं लेगीत घडल्यात. ह्या अपघाताचो पंचनामो पेडणें पुलिसांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
