भांगरभूंय | प्रतिनिधी
मडगांव: आदिवासी समाजाचे घटनात्मक हक्क मेळोवपा खातीर लढो उबारपाची गरज आसा. म्हणून आदिवासी स्वातंत्र्यसैनीक बिरसा मुंडा हांचे जयंतनीचे औचित्य सादून आयज (बुधवारा) आझाद मैदानार जाहीर बसकेचें आयोजन केलां. हे बसकेंतल्यान ‘उलगुलान’ चळवळ सुरू करतले. समाजभावांनी हे बसकेक व्हड संख्येन हाजीर रावचें अशें आवाहन ‘गोंयच्या अनुसुचीत जमातीं खातीर मिशन राजकी आरक्षण’ (मिशन पॉलिटिकल) हे संघटणेन केलां. संघटणेचे म्हणयारे गोविंद शिरोडकार हांणी म्हायती दिली.
आदिवासी क्रांतीकारक बिरसा मुंडा हांचे जयंती निमतान आयज दनपारां 3 वरांचेर आझाद मैदानार वयले बसकेचें आयोजन केलां. भारतीय संविधाना प्रमाण, आदिवासींचे हक्क आनी राजकी आरक्षणा खातीर ‘उलगुलान’ चळवळ सुरू करतले. बिरसा मुंडा हे पयले आदिवासी क्रांतीकारक आसात. जांणी आदिवासींच्या हक्कां खातीर ब्रिटिशां आड लढो दिला अशें शिरोडकार हांणी म्हणलें.
मुख्यमंत्र्यांनी विधानसभेंत 21 जुलय दिसा दिल्लें आस्वासन अजून पुराय केल्लें ना. अधिवेशन सोंपले उपरांत सर्वपक्षीय शिश्टमंडळ केंद्र सरकारा कडेन घेवन वतले अशें मुख्यमंत्र्यांनी तेन्ना म्हणिल्लें. पूण साडेतीन म्हयन्यां उपरांत लेगीत हें आस्वासन पुराय जाल्लें ना. मिशन पॉलिटिकल संघटणे कडल्यान 15 दिसांचो अल्टीमेटम दिवन लेगीत राजकी आरक्षणा खातीर राज्य सरकारान कसलींच सकारात्मक पावलां उबारलीं नात. मुख्यमंत्र्यांनी दिल्लें आस्वासन पुराय करचें अशेंय शिरोडकार हांणी म्हणलें.
गोंयच्या अनुसुचीत जमाती (एसटी) समाजाची सरकारा कडल्यान फटवणूक जाल्ल्याची भावना आसा. ताका लागून गोंयच्या अनुसुचीत जमातीं खातीर मिशन राजकी आरक्षण संस्था 16 एसटी संघटणेच्या तेंक्यान कार्यरत आसून अनुसुचीत जमातींच्या राजकी आरक्षणाच्या प्रलंबीत मागणेचेर सरकाराक जागे करपाच्या उद्देशान उलगुलान हें जनआंदोलन सुरू करपाचो निर्णय घेतला.
एसटी समाजाक तांचे घटनात्मक हक्क, मुळाव्यो सुविधा, टीएसपी निधी, जमीन अधिकार, रान हक्क, अनुशेश रितीं पदां, दर्जेदार शिक्षण, कृशी लाव बी आसून लेगीत हाचे पसून वंचीत दवरतात अशें शिरोडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
