भांगरभूंय | प्रतिनिधी
म्हापशें: बेतीं, बार्देस हांगा पडीक घराचो जीर्ण जाल्लो खांबो आंगार पडिल्ल्यान 5 वर्सां पिरायेच्या चलयेक मरण आयलें. तनीशा सचीन दमावकार अशें मयत चलयेचें नांव आसा.
ही दुर्दैवी घडणूक मंगळारा सकाळीं 11.15 वरांच्या सुमाराक घडली. मयत चलयेच्या घरा मुखार एक मातयेभरवण जाल्ल्या पडक्या घराचे दोन क्राँक्रिटाचे खांबे आशिल्ले. ह्या दोनूय खांब्यांक एक घटमूट अशी केबल वायर बांदिल्ली. ह्या वायरेचो वाठारांतले लोक कपडे सुकत घालपा खातीर वापर करताले. तशेंच ह्या केबलाच्या आदारान शेजारचीं भुरगीं खेळटालीं.
मयत चली घडणुके वेळार अशेच तरेन ते वायरीक धरून झोपाळो घेताली. ह्या वेळार जीर्ण जाल्ल्या त्या दोन खांब्यां मदलो एक खांब मुळा सावन कोसळ्ळो आनी ह्या चलयेच्या आंगार पडलो. हातूंत ताच्या तोंडाक खर जखम जाली.
हो प्रकार समजतकूच तिच्या कुटुंबान तशेंच शेजाऱ्यांनी घडणूक थळार धांव घेतली. एम्बुलन्स आनी पुलिसांक आपयलें. बेती पुलीस चवके वेल्या पुलिसांनी तिका आपले मोटारींत घालून थेट गोमॅकाँत उपचारा खातीर दाखल केले. पूण थंय दोतोरांनी तिका मरण आयिल्ल्याचें जाहीर केलें.
हे घडणुकेचो पंचनामो पुलिसांनी केला आनी असैमीक मरण म्हूण हें प्रकरण नोंद केलां. फुडलो तपास पुलीस निरिक्षक राहूल परब हांच्या मार्गदर्शना खाला उपनिरिक्षक सर्वेश भंडारी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
