भांगरभूंय | प्रतिनिधी
भांगरभूंय । प्रतिनिधी
दिवचलः गोंयांत सहकार पदवी आनी पदविका अभ्यासक्रम सुरूकरपाची म्हत्वाची घोशणा मुख्यमंत्री डॉ प्रमोद सावंत हाणे साखळे रवींद्र भवनांत आयोजीत केल्ले राष्ट्रीय सहकार सप्ताच्या उक्तावण कार्यावळींत केली. राज्यांत सहकार चळवळ नेटान फुडें सरची हें खातीर सगल्यांनी यत्न करपाची गरज आसा. राज्यांक आत्मनिर्भर करपाची तांक सहकारा मदीं आसा.राज्याक सहकारांतल्यान स्वावलंबी करपाची आमची मोख आसा अशेंय मुख्यमंत्र्यांनी सांगलें.
सहकार मंत्री सुभाष शिरोडकार, साखळेची नगराध्यक्ष रश्मी देसाय, गुरुदत्त संझगिरी, वल्लभ साळकार, वासुदेव परब, नाबार्डाचे मिलिंद बिरूड, सहकार निबंधक मॅन्युअल बार्रेटो, उल्हास फळदेसाय हाजीर आशिल्ले. सहकार मळार प्रामाणीकपणा म्हत्वाचो आसा. नवे पिळगेन ह्या मळार येवपाची गरज आसा. कांय सहकारी संस्थांनी लोकांचे पयशे हडप केल्ल्याचें सामकार आयिल्ल्यान लोकांनी आपल्या पय़शांची गुतवणूक करतना सादूर रावपाक जाय अशें मुख्यमंत्र्यांन सांगलें. सरकार कायदे कडक करून डिजिटल वेवस्था करपाची गरज तांणी उक्तायली.
सहकार मंत्री सुभाष शिरोडकार हाणे सहकार मळार बायलांचो सहभाग वाडोवपाची गरज उक्तायली.दरेका पंचायतींत एक भोव उद्देशीय संस्था सुरू करून सहकार मळांत समृद्धी हाडप शक्य आसा अशें ताणे सांगलें. दूद आनी भाजी हे खातीर आमकां शेजारच्या राज्यांचेर किद्याक निंबून रावचें पडटा हाचो विचार दरेका गोंयकारान करपाची गरज आसा. दरेका मळार लोकांनी विशेश रुची दाखयल्यार आमी दूद आनी भाजीपालो हातूंत आत्मनिर्भर जावपाक वेळ लागचो ना अशें शिरोडकारान सांगलें.
ह्या वेळार सहकार मळाक व्हड योगदान दिवपी गुरुदत्त संझगिरी (अध्यक्ष, दिवचल अर्बन बँक), आर के पिकळे, प्रतिमा धोंड, कृष्णा कुडनेकार, शिवाजी भांगी, पांडुरंग कुर्टीकार आनी हेरांचो मुख्यमंत्री डॉ सावंत हाचे हस्तुकीं भोवमान केलो. मिलिंद बिरूड हांणी देश पांवड्यार सहकार चळवळ आनी गोंयांतल्या सहकार वावराची म्हायती दिली. गोविंद भगत हाणे कार्यावळींत सूत्रसंचालन केलें, राज्यांतल्या वेगवेगळ्या सहकार संस्थांचे प्रतिनिदी कार्यावळीत वांटेकार जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
