भांगरभूंय | प्रतिनिधी
केंद्रीय सांख्यिकी आनी अंमलबजावणी खात्याचो अहवाल
पणजी, प्रतिनिधी ः केंद्रीय सांख्यिकी आनी अंमलबजावणी खात्याच्या अहवाला प्रमाण देशांतल्या हेर राज्यां परस गोंयांत म्हारगाय उणी आसा. अहवाला प्रमाण, किरकोळ म्हारगाय दर उणो आशिल्ल्या राज्यांचे क्रमवारींत गोंय देशांत चवथ्या क्रमांकाचेर आसा. सप्टेंबरांत लेगीत गोंयांत म्हारगाय दर उणें आशिल्लें. ऑक्टोबरांत गोंयांत म्हारगाय दर 3.03 टक्के आशिल्लो. जाल्यार पुराय देशांत हें प्रमाण 4.87 टक्क्यांचेर उरलो.
ह्या अहवाला प्रमाण, देशांत छत्तीसगढ राज्यांत सगळ्यांत उणें म्हारगाय दर 2.44 टक्के आसा. ताचे उपरांत नागालँड (2.54%), सिक्किम (2.55 %), गोंय (3.03 %), जम्मू-काश्मीर (3.49 %), अरुणाचल प्रदेश (3.76 %), मध्य प्रदेश (3.99 %), हिमाचल प्रदेश (४.०५ %), मिझोराम (४.०५ %), अस्तंत बंगाल (४.५ %) आनी आंध्र प्रदेश (४.६९ %) आसा.
ऑक्टोबरांत देशांत सगळ्यांत चड 10.25 टक्के म्हारगाय मणिपूरांत आशिल्ली. ताचे उपरांत ओडिशा (6.47 %), राजस्थान (6.25 %), हरियाणा (6.02 %), बिहार (5.63 %), कर्नाटक (5.63 %), तेलंगण (5.37 %), गुजरात (5.31 %), उत्तर प्रदेश (5.06 %), महाराष्ट्र (4.84 %), आसाम (4.84 %) आनी झारखंड (4.83 %) आसा.
केंद्र शासीत प्रदेशां मदीं दिल्लींत सगळ्यांत उणी म्हारगाय 2.48 टक्के आशिल्ली. ताचे सकयल लक्षद्वीप 2.43 टक्के, अंदमान निकोबार जुंवे (4.73 %), पुडुचेरी (4.82 %), दादरा आनी नगर हवेली (5.83 %) आसा. केंद्रीय सांख्यिकी खातें दर म्हयन्याक किरकोळ म्हारगाय दराचे अहवाल जाहीर करता.
ऑक्टोबराच्या अहवाला प्रमाण, देशांतलो म्हारगाय दर फाटल्या चार म्हयन्यांत सगळ्यांत उणो आसा. फाटल्या कांय म्हयन्यांत भाजीपालो आनी अन्नधान्याचे दर तुळेन देंवल्यात, जाका लागून म्हारगाय उणी जाल्या. कांद्याचे दर वाडूंक नाशिल्ले जाल्यार म्हारगाय अजून उणी जाता आसली. देशांत ऑगस्टांत 6.83 टक्के आनी सप्टेंबरांत 5.02 टक्के म्हारगाय दर आशिल्लो. भारतीय रिझर्व्ह बँकेन म्हारगाय दर 4 टक्क्यांनी देंवोवपाचें लक्ष्य दवरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
