भांगरभूंय | प्रतिनिधी
म्हापशें नगरपालिकेच्या कुचेली कोयर प्लांटांतलो प्रकार
म्हापशें, प्रतिनिधी ः म्हापशें पालिकेच्या कुचेली कोयर प्रकल्पांत स्थापन केल्लो ट्रान्सफॉर्मर दोन वर्सां उपरांत लेगीत चार्ज जायना. ताका लागून ह्या एमआरएफ प्रकल्पाच्या कामांत समस्या निर्माण जाल्या. वीज पुरवणाचेर आदारून आशिल्ल्या बेलिंग मशीनांच्या कामाचेर परिणाम जाला.
मेळिल्ले म्हायती प्रमाण, पालिकेच्या ह्या मटेरियल रिकव्हरी सुविधा प्रकल्पा खातीर दोन वर्सां आदीं वीज ट्रान्सफॉर्मर उबारिल्लो. पूण आयज मेरेन हो ट्रान्सफॉर्मर वीज जोडून चार्ज जावंक ना. नवो वीज ट्रान्सफॉर्मर घालपाच्या कामा खातीर पालिकेन गोंय राज्य शार उदरगत एजन्सी कडेन संपर्क सादिल्लो. ते प्रमाण जीसुडान 2021 वर्सा हो नवो ट्रान्सफॉर्मर लायलो. पूण वेगवेगळ्या समस्यांक लागून तो अजून चालू जावंक ना. कोयराचेर प्रक्रिया केल्या उपरांत तयार जावपी वायूचेर हो एमआरएफ प्लांट चलता. पूण प्लांटांत कांय समस्या आसल्यार वा देखरेखीचें काम करप शक्य जायना. हाका लागून पालिकेन परतून जेसूडा कडेन संपर्क सादला आनी पत्र धाडून ही प्रक्रिया बेगीन करपाची विनवणी केल्या. जाका लागून ट्रान्सफॉर्मराक चार्ज करून वापरपाक मेळटलो.
फाटल्या ऑगस्टांत ट्रान्सफॉर्मराची तपासणी जाल्ली. तातूंत नगरपालिका तंत्रीक खात्या वांगडा कंत्राटदार आनी सहाय्यक विद्युत अभियंत्यांचो आस्पाव आशिल्लो. रिंग मेमन युनिट (आरएमयू) बसयले बगर ट्रान्सफॉर्मर चार्ज करुंक मेळना अशें त्या तपासणेंत दिसून आयल्ले. सुमार 35 लाख रुपया खर्च करून हो आरएमयू युनिट घेवपाचो प्रस्ताव पालिकेन सरकाराक धाडला.
हे संबंदी पालिका जीसूडा कडेन चर्चा करता. ह्या ट्रान्सफॉर्मरा खातीर आतां आरएमयू युनिट लावचो पडटलो अशी म्हायती आमकां मेळ्ळ्या आनी आमी मुखेल अभियंत्या कडल्यान मान्यतायेची वाट पळयतात. ही मान्यताय मेळ्ळ्या उपरांत म्हयन्या भितर हें काम पुराय जातलें अशी म्हायती नगराध्यक्ष प्रिया मिशाळान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
