भांगरभूंय | प्रतिनिधी
पणजी, प्रतिनिधी : कदंब म्हामंडळान २०१८-१९ ते २०२२-२३ हीं पांच वर्सां ७ लाख २१ हजार ८७८ रुपयांचो दंड वसूल केलो. हो दंड फुकट प्रवास करप्यां कडल्यान वसूल केला. ह्या काळांत म्हामंडळाच्या अधिकार्यांनी कदंबाच्या ताफ्यांतली १ लाखां परस चड बसींची तपासणी केली. म्हामंडळा वतीन जाहीर केल्ल्या अहवालांतल्यान ही म्हायती मुखार आयल्या.
अहवाला प्रमाण, महसूल गळती आडावपा खातीर कदंबा कांय वर्सां सावन विशेश यत्न करता. हांतलो एक भाग म्हणून तिकेटी विणें प्रवास करपी प्रवाशां कडल्यान दंड वसूल करपाक मेळटा. फाटल्या पांच वर्सांनी म्हयन्याक १२ हजार, जाल्यार वर्साक १ लाख ४४ हजार रुपयांचो दंड वसूल केला. २०१९- २० त सगळ्यांत चड २ लाख ३६ हजार ८७५ रुपया दंड वसूल केलो.
फुकट प्रवासी धरपा खातीर विवीध मार्गा वयल्या बसींची तपासणी करता. पांच वर्सांच्या काळांत म्हयन्याक ७ हजार २०२, जाल्यार वर्साक ८६ हजार ४८४ बसची तपासणी केली. २०१९- २० त सगळ्यांत चड २६ हजार ७९१ बसींची तपासणी केल्ली. २०२०- २१त २३ हजार ११४ बस, जाल्यार २०२१- २२ त १८ हजार ९५८ बसी तपाशिल्ल्यो.
तिकेटी शिवाय कदंबांत प्रवास करप्यांक धरपा खातीर कदंबा वतीन कर्मचार्यांचो पंगड तयार केल्यात. विशेश अधिकारीय तैनात केल्यात. ते तपासणी पंगडाच्या कर्मचार्यांचेरूय लक्ष दवतात. पांच वर्सांनी अधिकार्यांनी ३६ हजार ७८० कंडक्टरांची तपासणी केली. २०२०- २१ त १० हजार, जाल्यार २०२१- २२ त ९ हजार कंडक्टरांची तपासणी केली.
२०२२- २३ ह्या वर्सा कदंबान प्रती किलोमीटर प्रवासा खातीर ८५ लाख रुपया खर्च केले, जाल्यार ८७ लाख रुपया उत्पन्न मेळयलें. हातूंत सरकाराच्या अनुदानाचो आसपाव आसा. २०२१-२२ त कदंबान प्रती किलोमीटर प्रवासा फाटल्यान १.०६ कोटी रुपया जोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
