भांगरभूंय | प्रतिनिधी
पणजी : गोंयांत फांतोडेर पांच वरांचेर जोगलां, गडगड्या सयत पावस सुरू जालो. तो सकाळीं १० मेरेन पडटालो. ताका लागून जनजीण कांय प्रमाणांत विस्कळीत जाली. खास करून राष्ट्रीय खेळां सर्तीच्या कांय मैदानांचेर चिखल जालो. कांपालार ज्युडो सर्त जाली, थंय जनरेटर उदकाक लागून बंद पडलो. लायट नाशिल्ल्यान तंबूंतल्या मैदानाचेर काळोख जाल्लो.
फाटल्या २४ वरांत दाबोळी, मडगांव, पणजे २ ते ४ इंच पावसाची नोंद जाल्या. राज्यांत खुबश्या सुवातांचेर काल रातच्यान गायब जाल्ली लायट दनपरां मेरेन येवंक नासली. कांय शारांतले रस्ते उदका पोंदाक गेले. कला अकादमी कडल्या रस्त्याचेर उदक तुंबिल्लें. कांय कडेन झाडां पडल्यांत. हो पावस असोच आनीक दोन दीस रकतलो असो अंदाज हवामान खात्यान उक्तायला.
काल हवामान खात्यान फुडले तीन दीस पावस आसतलो अशी शक्यताय उक्तायल्ली.
फांतोडेर पांच वरांचेर गोंयच्या कांय वाठारांनी पावसाक सुरवात जाली. घशघशीत पावस तशेंच गडगडो आनी जोगलायल्ल्यान चडश्या वाठारांनी लायट नाशिल्ली. तशेंच कांय सुवातांचेर झाडां पडिल्ल्यान उजो पालोवपी दळाचे जवान तीं काडपांत गुंथल्यात. तशेंच वीज कर्मचारीय रातच्यान विजेची पुरवण करपाक गुंथल्यात. दिवचले सकाळीं ८ वरांचेर लायट गेल्ली. शार वाठारांतले रस्तेय पावसाच्या उदका पोंदाक बुडल्यात. तशेंच शारांत कांय कडेन चिखल जाल्ल्यान गाडयो तातंत रोमिल्ल्याचें चित्र पळोवपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
