भांगरभूंय | प्रतिनिधी
4 पिलांय भोंवत आशिल्ल्यान वाठारांत भिरांतीचें वातावरण
फोंडें: शिमेपायण-म्हाड्डोळा परतून बिबट्याची दहशत सुरू जाल्या. बिबट्या सयत 4 पिलां भोंवतना दिसून येत आशिल्ल्यान वाठारांत भिरांतीचें वातावरण पातळ्ळां. वाठारांत 10 ऑक्टोबर दिसा अनवळखी मनशान लायिल्ल्या फांसांत आडकून बिबट्याक मरण आयिल्लें.
थळाव्यांनी दिल्ले म्हायती प्रमाण फाटल्या 10 ते 12 दिसां सावन वाठारांत बिबट्या सयत 4 पिलां रस्त्या वयल्यान भोंवतना दिसून आयलीं. चडशीं करून सकाळच्या वेळार रस्त्यान यो-वच करपी वाहन चालकांक बिबट्याचीं पिलां दिसून येतात. ताका लागून वाहन चालक त्या रस्त्या वयल्यान वचपाक भियेतात.
अनवळख्यांनी फाटल्या म्हयन्यांत लायिल्ल्या फांसांत एका बिबट्याक मरण आयिल्लें. फाटल्या कांय दिसां सावन परतून बिबटे दिसूंक लागिल्ल्यान अनवळखी लोक फांस लावन बिबट्याची शिकार जावपाची शक्यताय थळावे लोक उक्तायतात. रान खात्यान वाठारांत पळोवणी करून लोकवस्ती कुशीक येवपी बिबट्याचो सोद घेवन तांकां जेरबंद करपाची मागणी लोक करतात.
शिमेपायण कुशीक आशिल्ल्या मडकय ते कुंडय मेरेनच्या बायपास रस्त्यार हाचे पयलीं बिबटो दिशिल्लो. एक बिबटो दुचाकी फाटल्यान लेगीत लागिल्लो. पूण ऑक्टोबर म्हयन्यांत फांसांत आडकून मरण आयिल्लो बिबटो दिसून आयले उपरांत बायपास रस्त्यार बिबटो दिसून येना अशी म्हायती गोपां कडल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
