भांगरभूंय | प्रतिनिधी
7 लाखांचो म्हालवज जप्त; 5 दीस पुलीस कोठी
वास्को: दोन घरफोडी प्रकरणांत अटक केल्लो आमीर शेख (68) हाचे कडल्यान वास्को पुलिसांनी चोरयेक गेल्लो सात लाखां परस चड मोलाचो म्हालवज जप्त केला. ताका न्यायालयांत उबे करतकूच न्यायालयान ताका पांच दीस पुलीस कोठी दिल्या.
दोन घरफोडी प्रकरणांत वास्को पुलीस स्टेशनार कागाळी दाखल जाल्ल्यो. चोरान भांगराच्यो वस्ती, रोख रक्कम, विदेशी चलन आनी घडयाळी चोरून व्हेल्ल्यो. सीसीटीव्ही कॅमेरांत हो चोर बंदिस्त जाल्लो. ताका लागून वास्को पुलीस त्या फुटेजीच्या आदारान ताचो सोद घेताले.
सोमारा रातीं वास्को पुलीस स्टेशनाचे उपनिरिक्षक स्वप्नील नायक हे गस्तीर आशिल्ले. ते विमानतळ मार्गान येता आसतना पुलीस जिपीच्या दिव्याचो उजवाड रस्त्यान चलत वतल्या एका मनशाचेर पडलो. त्या मनशान फाटीं वळून पळयलें. त्या वेळार चोरी प्रकरणांत जाचो सोद घेताले तोच मनीस आशिल्ल्याचें नायक हांकां दिसून आयलें. तांणी जिपींतल्यान देंवून ताका धरपाचो यत्न केलो. पूण ताणें धांव मारली. ह्या वेळार नायक हांणी पुलीस स्टेशना वयल्या एलआयबी पुलीस पंगड आनी हेर पुलिसांक आपयले. उपरांत जयरामनगर हांगा त्या मनशाचो सोद घेतलो. दोन वरां सोद घेतले उपरांत ताका धरलो.
त्या मनशाक पुलीस स्टेशनार हाडले उपरांत ताणें चोरयेची कबुली दिली.
आमीर शेख हाणें थिये एक कूड भाड्यान घेतिल्ली. थंय ताणें चोरयेचो म्हालवज लिपोवन दवरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
