भांगरभूंय | प्रतिनिधी
पणजी, प्रतिनिधी: १४.९ कोटींची फटवणूक केल्ल्याचो आरोप, घरकान्न, चल्याकूय जावं शकता अटक
म्हापसा : रेयश मागूश गांवांत प्लॉट दिता अशें सांगून १५ कोटी रुपयांची फटवणूक केल्ल्याच्या आरोपा वयल्यान आदले मंत्री सुरेश परुळेकार हांकां अटक करपाक मुंबय अर्थीक गुन्यांव विभागाचो पंगड गोंयांत दाखल जाला. उच्च न्यायालयान श्री. परुळेकर हांचो, तांच्या पुताचो आनी घरकान्नीचो अटकपूर्व जामीन अर्ज हालींच भायर मारिल्लो.
हे विशीं चड म्हायती प्रमाण, जमीन दितां अशें सांगून दिवचलचे एके व्यक्तीक १४.९ कोटी रुपयांक तोपी घाल्ले खातीर रेईश- मागूश रिअल इस्टेट कंपनीचे संचालक तशेंच कळंगुटेचे आदले मंत्री सुरेश परूळेकार हांकां अटक करपाक मुंबय अर्थीक गुन्यांव विभागाचो पंगड आयज गोंयांत आयला. विशेश म्हळ्यार ह्या गुन्यांवांत परुळेकार हांची घरकान्न मंदा आनी पूत प्रसाद हांचेय आड गुन्यांव दाखल जाला. ह्या तिगांयचो अटकपुर्व जामीन अर्ज ३१ ऑक्टोबराक मुंबय शार दिवाणी आनी सत्र न्यायालयान अर्ज भायर मारिल्लो.
परूळेकार आनी तांची घरकान्न आनी पुतान जमीन दिवपाचें सांगून फटयल्ल्याची कागाळ प्रेमचंद गांवस (मूळ दिवचल) हांणी २० जून २०२३ दिसा मुंबय पुलिसांच्या अर्थीक गुन्यांव विभागा कडेन नोंद केल्ली. कागाळी प्रमाण, गांवस हांणी जानेवारी २००८ ते फेब्रुवारी २०२३ ह्या काळांत परूळेकार हांकां हप्त्यांनी १४ कोटी ९० लाख रुपया दिल्ले. गांवस आनी तिनूय संचालकां मदीं जमीन वेव्हारा विशीं सगळ्यो बसका ताडदेव -मुंबय हांगा जाल्ल्यो.
कंपनीच्या संचालकान फटवणूक केल्या हें कळटकच गांवस हांणी पुलिसांक सांगलें. मुंबय पुलिसांच्या अर्थीक गुन्यांव खात्यान चवकशी करून कंपनीचे संचालक सुरेश परुळेकार, तांची घरकान्न आनी पुता आड केश नोंद केली. ह्या प्रकरणांत अटक जावपाची भिरांत आशिल्ल्यान तीन संचालकांनी मुंबय सिटी सिव्हिल अँड सेशन कोर्टांत संपर्क सादलो. मात, न्यायाधीश एस. बी जोशीन हो गुन्यांव गंभीर आसा हें पळोवन ३१ ऑक्टोबराक अटक करचे पयलीं जामीन अर्ज न्हयकारलो. देखून तांकां अटक करपाक मुंबय पुलीस अर्थीक गुन्यांव खात्याचो पंगड आयज गोंयांत पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
