भांगरभूंय | प्रतिनिधी
महोत्सवात 270 परस चड चित्रपटांचे प्रदर्शन
पणजी, प्रतिनिधी : गोंयांत 20 ते 28 नोव्हेंबर ह्या काळात जावपी 54 व्या इफ्फीची सुरवात युकेच्या ‘कॅचिंग डस्ट’ ह्या चित्रपटान जातली. स्टुअर्ट गट हांणी हो चित्रपट दिग्दर्शित केला. महोत्सवात तरेकवार गटात मेळून 270 परस चड चित्रपटांचे प्रदर्शन जातले. केंद्रीय म्हायती आनी प्रसारण मंत्री अनुराग ठाकूर हांणी दिल्लींत पत्रकार परिशदेंत ही म्हायती दिली.
रॉबर्ट कोलोडनी हांच्या ‘द फिदरवेट’ ह्या चित्रपटान इफ्फीचो समारोप जातलो. इंडियन पॅनोरमा, इंटरनॅशनल सेक्शन, प्रीमियर अशा गटांनी चित्रपटांचें प्रदर्शन जातलें. दर वर्सा प्रमाण अंदूय मास्टर क्लास, 75 क्रिएटिव्ह मायांडस ऑफ टूमॉरो, सेलिब्रेटिंग कल्चर ह्यो कार्यावळी जातल्यो.
फ्रान्साचो ‘अबाऊट ड्राय ग्रासेस’ हो मिड फेस्ट चित्रपट आसतलो. इंटरनॅशनल सेक्शन फाट्यात 198 चित्रपटांचें प्रदर्शन जातलें. फाटल्या वर्सा परस अंदू ह्या फाट्यांत 18 चित्रपट चड आसा. गोंयच्या चित्रपटां खातीर गोवन सेक्शन, शिगमोत्सव, फिल्म बाजार हे इफ्फीचें खासा आकर्षण आसतलें. प्रतिष्ठेच्या सत्यजित रे जिणे गौरव पुरस्कारा खातीर मायकल डग्लस हांची निवड जाल्या. महोत्सवाक आता फकत 12 दीस आशिल्ल्यान तयारी नेटान सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
