भांगरभूंय | प्रतिनिधी
सुरक्षा रक्षक नेमपाचो केळशी पंचायतीचो निर्णय
मडगांव, प्रतिनिधी : केळशी दर्यादेगेर मसाज करपी आनी विवीध वस्तू विक्री करपी फेरीवाल्यांचो त्रास पर्यटकांक जाता. ताका लागून केळशी पंचायती कडल्यान खाजगी सुरक्षारक्षक नेमपाचो निर्णय घेतला, अशी म्हायती सरपंच डिक्सन वाझ हांणी दिली.
केळशेची ग्रामसभा आयतारा जाली. हातूंत व्हडा संख्येन थळावे हाजीर आशिल्ले. ह्या वेळार गांवची उदरगत आनी पर्यटना कडेन संबंदीत विवीध विशयांचेर चर्चा केली.
सरपंच डिक्सन वाझ हांणी हाजीर आशिल्ल्या सगळ्यांक सांगलें, पर्यटकांक दर्यादेगेरच्या फेरी वाल्यांक धांवडावपाक तीन खाजगी सुरक्षारक्षक तैनात करपाचो निर्णय घेतला. दर्यादेगेर फेरीवाले आनी मसाजवाले अशे विवीध अवैध धंदे करपी व्यक्ती दर्यादेगेर विसव घेवप्यांक त्रास दितात. पुलीस उपलब्ध करून दिवपा खातीर दोन फावटी सरकाराक पत्रां धाडल्यांत तशेंच पर्यटनमंत्री रोहन खंवटे हांचे कडेनूय ही समस्या मांडल्या. पूण आजून हाचेर कांयच उपाय करूंक ना. फेरीवाल्यांक धांवडावन घालपा खातीर पंचायती वतीन सुरक्षा कर्मचारी नेमपाचो निर्णय घेतलो अशी म्हायती सरपंच डिक्सन वाझ हांणी दिली.
ग्रामसभेंत नागरिकां कडल्यान मोबोर हांगा व्हांवून येवपी प्रदुशीत उदकाचोय प्रस्न मांडलो. हाचेर सरपंच वाझ हांणी पंचायती कडल्यान गोंय राज्य प्रदूशण नियंत्रण मंडळाक पत्र बरोवन गरजेची कारवाय करपाची मागणी केल्या. ठोक नुस्तें मार्केट पसून बेतूल मेरेनचो कोयर साळ न्हंयत सोडटले. अशे तरेन सगळे नेम मोडप्यांचेर कारवाय करपाची मागणी केल्ल्याचें सांगलें. तशेंच कांय पर्यटकां कडल्यान सुचवण्योय आयल्यात. जातूंत फटपाथ, दर्या देगे वयलो कोयर आनी तुटिल्लो हारसो आनी भौशीक येरादारीचो उणाव अश्यो समस्या आसात.
पर्यटकांच्या ह्या समस्यां विशीं थळावे आमदार आनी राज्य सरकाराचे मजतीन सोडयतले अशेंय वाझ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
