भांगरभूंय | प्रतिनिधी
म्हापशें, प्रतिनिधी : कोलवाळचे गृहनिर्माण वसणुकेंत काल एक बायल बेशुद्ध अवस्थेंत सांपडली. ती 30 पिरायेची आसा. ती अनैतीक धंद्यांत घुस्पल्ल्याचें उक्ताडार आयलां.
हे विशीं चड म्हायती प्रमाण, ही बायल बेशुद्ध अवस्थेंत थळाव्यांक सांपडली. तिका कोणेंतरी हाडून हे वसणुकेंत उडयल्ल्याचो दुबाव नागरीक उक्तायतात.
हे घडणुके विशीं म्हायती मेळटांच कोलवाळ पुलीस घडणुके सुवातेर दाखल जाले आनी तांणी तिका उपचारा खातीर म्हापशें जिल्हो हॉस्पिटलांत दाखल केली. हॉस्पिटलांत ती सोर्याचे नशेंत आशिल्ल्याचें कळ्ळें. तशेंच ती जंय बेशुद्ध अवस्थेंत सांपडिल्ली तीन बियरीच्यो बाटल्यो पडिल्ल्यो. दनपरां ते बायलेची नशा देंवली. उपरांत तिका डिस्चार्ज दिलो. पुलिसांनी तिका ताब्यांत घेवन पुलीस स्टेशनांत व्हेली. तिची बिगर सरकारी संस्थेच्या पदाधिकार्यांचे हजेरींत जबानी घेतली. तेन्ना ती बांदा – महाराष्ट्र हांगाची आनी तिका दोगां भुरगींय आसा हें कळून आयलें.
आपूण अनैतीक वेवसायांत घुस्पल्ल्यान शुक्रारा रातच्या वेळार घोवान आपल्याक बडोवन घरांतल्यान धांवडायली. ताका लागून सकाळीं गोंयची बस धरली आनी कोलवाळे आयली. थंय सोर्याच्या दुकानांतल्यान तीन बियरीच्यो बाटल्यो घेतल्यो. घडणुके सुवातेर बसून त्यो पिल्यो आनी थंयच न्हीद लागली, अशें जबानींत तिणें म्हणलां.
मजगतीं, पुलिसांनी जेन्ना तिच्या घोवाक संपर्क केलो तेन्ना तांणी तिका घरा परत व्हरपाक न्हयकार दिलो. ताका लागून कोलवाळ पुलिसांनी उपजिल्होधिकार्यांची मान्यताय घेवन तिका मेरशेच्या सुधारघरांत धाडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
