भांगरभूंय | प्रतिनिधी
पेडणे, प्रतिनिधी ः मांद्रेंच्या इतिहासांत पयलेच खेपे मांद्रे मतदारसंघांतल्या कूळ, मुंडकारांचे खटले न्यायालयांत चालू आसात आनी तांकां अजून न्याय मेळूंक ना. तशेंच न्यायालयांत नवीन खटले दाखल करपाक सोदपी अशा संबंदीत लोकांक फुकट वकील दिवपाचो उपक्रम आमदार जीत आरोलकार हांणी चालीक लायला. वट्ट स वकिलांची खासा मांद्रे मतदारसंघा खातीर नेमणूक केल्या अशें तांणी सांगलें.
मांद्रे मतदारसंघांतले खटले कूळां कडेन संबंदीत आसूं वा नासूं हे वकील न्यायालयात उलयतले. आनी ते खातीर खंयच्याच वकिलाक पयशे दिवपाची गरज ना. तांची जी फी आसतलीं ती हांव दितलो अशें आमदार आरोलकार हांणी सांगलें. जायते खटले न्यायालयांत प्रलंबीत आसात. तारखेर तारीख दितात. हो प्रकार खंय तरी बंद जावपाक जाय. हे खातीर आमी सरकारी यत्न सुरू केल्यात आनी हालीं मुख्यमंत्री डॉ. प्रमोद सावंत हांकां मेळून हे संबंदीं निवेदन सादर केलें. तांणी कूळ मुंडकारांचीं प्रकरणां सोडोवपाक खाशेलो मामलेदार नेमपाचें आस्वासन दिलां. हे वा नवे खटले दाखल करपाचे आसात ते पोरणे खटले आसात. फकत तीन तारखांनी तें निश्चीत जावचें अशी मागणी हांवें मुख्यमंत्री सावंत हांचे कडेन केली. येवपी विधानसभा अधिवेशनांत अशें विधेयक हाडून ताका मान्यताय मेळटली असो विस्वास आरोलकार हांणी उक्तायला.
ह्या संदर्भार उलयतना आरोलकार हांणी म्हणलें, मांद्रे मतदारसंघांत ज्यांची कूळांची जमीन आसा वा कूळ मुंडकार आसात जांची अजून तांच्या नांवार घरां नात अशा नागरिकांनी आमच्या कार्यालयांत वा नेमिल्ल्या वकिलां कडेन संपर्क करून कागदपत्रां सादर करचीं. मागीर ते खटले न्यायालयांत दाखल करतले. चडांत चड नागरिकांनी ह्या उपक्रमाचो फायदो घेवचो असो उलो आरोलकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
