भांगरभूंय | प्रतिनिधी
मडगांव पालिकेचे बसके उपरांत दामोदर शिरोडकाराचें सांगणें
मडगांव: मडगांव पालिकेच्या इमारतीच्या पाख्याची किरकोळ दुरुस्ती करपाच्या कामाक मंजुरी दिल्या. धा वर्सां पोरण्या दुकानांची परतून पावणी करपा सयत भौशीक बांदकाम खात्या कडल्यान जारी केल्ल्या प्लींथ क्षेत्र दरांचो प्रस्तावूय पालिका मंडळान स्विकारला अशें नगराध्यक्ष दामोदर शिरोडकार हांणी सांगलें. करांचे रकमेंत वाड केले बगर पालिकेक अर्थीक महसूल येवप शक्य ना अशेंय शिरोडकार हांणी म्हणलें.
मडगांव पालिका मंडळाची बसका शुक्रारा सकाळीं पालिका इमारतीच्या सभाघरांत जाली. उपरांत नगराध्यक्ष शिरोडकार हांणी सांगलें, पालिकेचे मुख्य कारकून आंतोनियो बार्रेटो हांणी स्वेच्छा निवृत्ती खातीर अर्ज सादर केला. हाचे आदींय तांणी भलायकीचे कारण सांगून अशे तरेन स्वेच्छानिवृत्ती खातीर अर्ज केल्लो. पूण 90 दिसांचो नोटिसीचो काळ पुराय जावचे अदींच तांणी अर्ज फाटीं घेतलो. असो प्रकार परतून जाल्यार तीच प्रथा पडत आशिल्ल्यान तांचो अर्ज पालिका मंडळा मुखार दवरिल्लो आनी तो मान्य केलो.
मडगांव पालिका इमारतीच्या पाख्याच्या दुरुस्तीची गरज आशिल्ल्यान पालिका इमारतीच्या दुरुस्ती करपाच्या कामाक मंजुरी दिवपा खातीर पालिका मंडळा मुखार प्रस्ताव आशिल्लो. पालिकेन ताका मंजुरी दिल्या. अदमासपत्रक करून उपरांत कामाक सुरवात करतले. तशेंच पालिका इमारतीच्या नुतनीकरणाच्या कामाक, रंगकामाक आनी हेर गरजेचें काम सध्या करचे नात. पालिके कडेन सद्या अर्थीक तरतूद नाशिल्ल्यान ते काम उपरांत करतले. पालिकेच्या अधिकारांतले गांधी मार्केटांतल्या धा वर्सा पुराय जाल्ल्या दुकानांची पावणी करपाचें थारलें. दोन नव्यो गाडयो घेवपाच्या प्रस्तावाक मंजुरी मेळ्ळ्या.
न्यू मार्केटाच्या इमारतीच्या पाख्याचें गरजेचें काम करून दिवपाची मागणी विक्रेत्यांनी केल्ली. ते प्रमाण न्यू मार्केट इमारतीच्या दुरुस्ती करपाचें पालिका मंडळान थारायलें. बांदकाम खात्या कडल्यान जारी केल्ल्या सुधारीत प्लींथ क्षेत्र दर स्विकारपाचेर चर्चा केली आनी सुदारीत दर स्विकारले. पालिकेन जे कर वाडयल्यात आनी जे सुदारीत दर स्विकारल्यात ते राज्य सरकाराच्या निर्देशा प्रमाण केल्यात. ऑडिटा वेळार त्रुटी काडटात आनी परतून वसुलीचे काम करचें पडटा. दरवाडीचो निर्णय घेवन तो आतांच वाडयलो ना जाल्यार मडगांव पालिके वेलो अर्थीक ताण आनीक वाडटलो अशें दामोदर शिरोडकार हांणी सांगलें.
30 टक्के वेपार परवानग्या बगर
मडगांव पालिका दर म्हयन्याक 1.80 कोटी रुपया कर्मचाऱ्यांक पगार दिता. पालिकेचे कर्मचारी काम करपाक टाळाटाळ करतात. तांकां सगल्यांक सुचोवण्यो करतले. पांच पंगडा कडल्यान थकबाकी वसुली करतात. दर दिसा एक लाख ते देड लाख रुपयांची थकबाकीची वसुली करतात. 30 टक्के वेपार हो परवान्या बगर करतात. ताची पळोवणी करून अहवाल तयार करतात. तांकांय परवानो घेवन वेवसाय करपा खातीर बंधनकारक करतले अशें नगराध्यक्ष दामोदर शिरोडकार हांणी सांगलें.
कोयर उडोवपा खातीर सुवात सोदतात
फुडल्या पांच ते स वर्सांत गोंयभर कोयराची मोटी समस्या निर्माण जावंक शकता. घरपट्टी आनी कोयराचो कर घेत आसले तरी मडगांव आनी फातोड्डेंच्या लोकांनी आपल्या कोयराचो विलो आपआपल्या वाठारांत लायल्यार पालिके वेलो ताण उणो जातलो. कोयर उडोवपा खातीर सुवात उपलब्ध ना. कांय कडेन पळोवणी केल्या. गोंय सरकारान मंजुरी दिल्यार सुवात निश्चीत करतले अशें नगराध्यक्ष दामोदर शिरोडकार हांणी सांगलें.
फायल शेणत जाल्यार पुलीस कागाळ
पालिका कचेरेंतल्यो फायली शेणपाचे प्रकार वाडत आसात. आतां खटल्याच्यो फायली शेणिल्ल्याचें आयकूंक मेळटा. हाचे आदीं पुलीस कागाळ करतले अशें म्हणटकूच दुसरेच दिसा फायली मेळटाल्यो. अशे प्रकार आतां खपोवन घेवचे नात. ताका लागून फायल मेळ्ळी ना जाल्यार रोखडीच पुलीस कागाळ करपाचो निर्णय घेतला आनी तशी सुचोवणी मुख्याधिकाऱ्याक केल्या. रोखडेच सगले कर्मचारी आनी मुख्याधिकारी हांचे सयत बसका घेवन गरजेचे ते निर्देश दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
