भांगरभूंय | प्रतिनिधी
पणजी, खबरां मेज : समाज कल्याण संचालनालयान केंद्र/ राज्य पुरस्कृत शिश्यवृत्ती येवजण, २०२३ अर्थीक वर्सा खातीर ऑनलायन अर्ज मागयल्यात. समाज कल्याण संचालनालया वतीन अनुसुचीत जाती आनी हेर मागास वर्ग समाजांतल्या विद्यार्थ्यां खातीर प्री- मॅट्रीक, पोस्ट- मॅट्रीक शिश्यवृत्ती येवजण आनी अर्थीक मागास वर्गांतल्या विद्यार्थ्यां खातीर डॉ. आंबेडकर पोस्ट मॅट्रीक शिश्यवृत्ती ह्या केंद्र पुरस्कृत येवजण्यांची अंमलवजावणी करूं येता.
शालांत आनी उच्च माध्यमीक मंडळांचे परिक्षेंत उच्च गुणवत्ता मेळयिल्ल्या एससी आनी धनगर समाजाच्या विद्यार्थ्यांक गुणवत्ता आदारीत पुरस्कार येवजण, गगन भरारी शिक्षा येवजण, होम नर्सिंग अभ्यासक्रम शिक्षण घेवपी एससी विद्यार्थ्यां खातीर कन्या धन येवजण, दिव्यांग विद्यार्थ्यां खातीर विद्यावेतन येवजण, एससी/ओबीसी विद्यार्थ्यां खातीर (पांचवी ते सातवी) सरल विद्या सहाय्य येवजणेची अंमलबजावणी करतले.
शिश्यवृत्ती खातीर अर्ज करपाक विद्यार्थ्यांनी https://cmscholarship.goa.gov.in चेर भेट दिवची. विद्यार्थ्यांनी आवश्यक दाखल्या सयत १५ डिसेंबर मेरेन अर्ज अपलोड करचे सगळ्या शाळां/संस्थां/महाविद्यालयांनी विद्यार्थ्यांच्या ऑनलायन अर्जांची तपासणी करून ३१ डिसेंबर मेरेन सुपुर्द करची.
अर्ज अपलोड करपाक कसलीय तांत्रीक मदत जाय आसल्यार शाळां/संस्थां/महाविद्यालयांनी ९४२३८८३३८६ ह्या मोबायल नंबरा वयल्यान तांत्रीक अधिकार्यां कडेन संपर्क करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
