भांगरभूंय | प्रतिनिधी
संमेलनाची तयारी निमाण्या पांवड्यार
पणजी: अखील भारतीय कोंकणी परिशद दर दोन वर्सांनी अखील भारतीय कोंकणी साहित्य संमेलन घडोवन हाडटा. ह्या वर्सा 25 वें अखील भारतीय कोंकणी साहित्य संमेलन मंगळुरूंत विश्व कोंकणी केंद्राच्या प्राकारांत नोव्हेंबराच्या 4 आनी 5 तारखेक घडून येता. संमेलनाची तयारी निमाण्या पांवड्यार पावल्या. ह्या संमेलनांत वांटो घेवप्यांचो आंकडो 1000 लागीं आसपाची आस्त आसा. तांची रावपाची आनी जेवणा खाणाची बरी वेवस्था करपाची तकालस मंगळुरूच्या वांगड्यांनी घेतल्या.
ह्या संमेलनाच्या अध्यक्षपदा खातीर भारतीय साहित्यकार हेमा नायक हांची निवड जाल्या. येवकार अध्यक्ष म्हूण मंगळुरूचे नामनेचे उद्देजक मायकल डिसोझा हांची निवड जाल्या. संमेलनाचे कार्याध्यक्ष म्हूण कवी आनी समिक्षक हेन्री मेंडोन्सा आनी सचीव म्हूण कवी टायटस नोरोन्हा हांची निवड जाल्या.
दोन दिसांच्या संमेलनांत साहित्याचेर आदारीत परिसंवाद आनी साहित्य सादरीकरणाचेर कार्यावळी जातल्यो.
ह्या कार्यावळींनी जे परिसंवाद आसात ते अशें-
परिसंवाद 1- कोंकणी साहित्य चळवळ आनी प्रोत्साहना खातीर पावलां, परिसंवाद 2- बालसाहित्य आनी युवा लेखकांचें साहित्य, परिसंवाद 3- कोंकणी रंगमाचयेची दशा आनी दिशा, परिसंवाद 4- कोंकणी साहित्याचे उदरगतींत नेमाळीं आनी समाज माध्यमांचें योगदान.
ह्या वर्सा आमी फक्त कवी संमेलन दवरिनासतना सहित्य सादरीकरण दवरलां. दोन वांट्यांनी जावपी हे कार्यावळींत सादारण 30 साहित्यकार वांटो घेतले. हातूंत कवितां वांगडाच ललीत, विनोदी, मोटव्यो काणयो हे सारखें साहित्य आयकूंक मेळटलें.
संमेलनाचें उक्तवण ज्येश्ठ हिंदी साहित्यकार आनी समिक्षक उदयन वाजपेयी हांचें हस्तुकीं जातलें. समारोपा खातीर बंगळुरूच्यो साहित्यकार डॉ. ममता सागर हाजीर आसतल्यो. पयल्या दिसा सांजेच्या 5 वरांर ह्या सोयर्यां वांगडा आनी कन्नड साहित्यकार पुरुषोत्तम बिलीमळे हांकां घेवन समकालीन लेखकां मुखा वेलीं आव्हानां ह्या विशयाचेर एक परिसंवाद आसतलो.
ह्या वर्सा प्रतिनिधींची नोंदणी 4 प्रकारांनी केल्या. पयल्या प्रकारांत विद्यार्थ्यां खातीर 100 रुपया फी आंखल्या. चडांत चड साहित्याच्या विद्यार्थ्यांनी ह्या संमेलनाचो फायदो करून घेवपाक जाय म्हूण ही तजवीज केल्या. दुसर्या प्रकारांत जे लोक रातचे रावचे नात तांचे खातीर 500 रुपयांची प्रतिनिधी फी आसा. सामान्य लोकां खातीर तिसरो प्रकार जातूंत 1000 रुपया फी आसा आनी जांकां रावपाची वेवस्था करतना वातानुलीत कूड जाय तांचे खातीर 2500 रुपया फी आसा. गुगल फॉर्मा वरवीं वां पावती काडून 500 वयर प्रतिनिधींनी तांची नोंदणी केल्या. थंय वचुनूय नोंदणी करपाची वेवस्था आसा. प्रतिनिधींनी मंगळुरू वचपाची सोय करची पडटली. राबित्याचे सुवाती कडल्यान संमेलनाच्या माटवांत हाड व्हर करपाची वेवस्था परिशदेन केल्या.
ह्या संमेलनाच्या उक्तावणांत साहित्य अकादेमीचे वेगळ्या वेगळ्या साहित्य प्रकारांत पुरस्कार फावो जाल्ल्या साहित्यकारांचे सत्कार जातले. तातूंत ज्योती कुंकळकार, मायरन बार्रेटो, माया खरंगटे, तुकाराम शेट, माणिकराव गावणेंकार आनी डॉ. तन्वी कामत बांबोळकार हांचो आस्पाव आसा.
तेच परी समारोपाच्या सुवाळ्यांत डॉ. कस्तुरी मोहन पै, डॉ. शिवराम कामत, रॉन रॉज कांसिया हांचो कोंकणीक दिल्ल्या योगदाना खातीर भोवमान जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
