भांगरभूंय | प्रतिनिधी
पणजी : राज्यांत आयज वार्या- वादळा सयत पावस येवपाची शक्यताय हवामान खात्यान उक्तायल्या. ताका लागून ‘येलो अलर्ट’ जारी केला. फाल्यां वातावरण सारकें आसतलें जाल्यार ३ ते ७ नोव्हेंबर मेरेन पावस पडपाची शक्यताय आसा. आयज पावसाक लागून राष्ट्रीय खेळां सर्तीचेर परिणाम जावपाची शक्यताय आसा.
हवामान खात्यान दिल्ले म्हायती प्रमाण, फाटल्या चोवीस वरांनी राज्यांत १४.९ मिलिमीटर पावसाची नोंद जाली. केप्यां सगळ्यांत चड ५०.२ मिमी पावसाची नोंद जाली. जाल्यार पेडण्यां ४४.८ मिमी, पोरणें गोंय २७.२ मिमी जाल्यार सांगें २४.१ मिमी पावस पडला. मजगतीं, हवामान खात्यान ३० आनी ३१ ऑक्टोबराकूय ‘यलो अलर्ट’ जारी केल्लो. ते प्रमाण काल गोंयच्या खुबश्या वाठारांनी पावस पडलो. पावसाक लागून राष्ट्रीय खेळां सर्तींत आडखळ निर्माण जाल्ली. आयज पणजे चडांत चड ३३.३ आनी उण्यांत उणो २३ अंश सेल्सिअस तापमानाची नोंद जाल्या.
फुडले तीन ते चार दीस राज्याच्या तापमानांत व्हडलोसो फरक जाणवचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
